महेश रिजाल, भालुवाङ (दाङ) ।
पूर्वपश्चिम हुलाकी राजमार्ग निर्माणमा सरकारको राष्ट्रपति चुरे तराई मधेस संरक्षण विकास कार्यक्रम बाधक देखिएको छ ।
उक्त सडकको चिराईखोला पक्की पुलदेखि पश्चिमोत्तर ११ किमि कपिलवस्तु जिल्लाको कल्याणकोट र गढवा गाउँपालिका–१ बौराहा क्षेत्र दाङ जिल्लाको १२.९ किमिसमेत २३.९ किमि र बौराहादेखि हुलाकी राजमार्गको गढवा–१ बनघुस्री सम्म ३५.९ किमि सडक निर्माण गर्न सरकारको राष्ट्रपति चुरे तराई मधेस सरक्षण विकास समिति बाधक बनेको देखिएको हो ।
हुलाकी सडकअन्तर्गत कपिलवस्तु जिल्लाको कृष्णनगर नगरपालिकाको बहादुरगञ्जचोकदेखि कपिलवस्तुकै शिवराज नगरपालिकास्थित चिराईखोला पुलसम्म २३ किमि दुरीमध्ये २० किमि पक्की र त्यसबाहेक ३ किमि ग्राभेल कार्य सम्पन्न भइसकेको छ ।
सो विषयमा हुलाकी सडक आयोजना महाशाखाका महानिर्देशक कुवेर नेपालीसित सम्पर्क गर्दा गत दुई वर्षदेखि उक्त क्षेत्रको सडक निर्माणमा वन तथा वातावरण मन्त्रालयबाट वातावरणीय प्रभाव मूल्याङ्कनसमेत प्रमाणित भई सोही मन्त्रालयको सिफारिससाथ सरकारको राष्ट्रपति चुरे तराई मधेस संरक्षण विकास प्रधान कार्यालय खुमलटार ललितपुरमा अनुरोध गरेको करिब दुई वर्षसम्म पनि सुनुवाइ नभई आलटाल हुँदा सो हुलाकी सडकको उक्त खण्ड निर्माणमा समस्या भएको बताउनुभयो ।
यस विषयमा सरकारको राष्ट्रपति चुरे तराई मधेस संरक्षण विकास समिति प्रधान कार्यालय खुमलटारका प्रमुख सदस्यसचिव गणेश पौडेलसँग बुझ्दा सो माग आफूकहाँ आइपुगेको, सो विषयमा अध्ययन भइरहेको तर निर्णयमा पुगिनसकेको हुँदा सो हुलाकी सडकखण्ड निर्माणमा ढिलाइ हुन गएको स्पष्ट पार्नुभयो ।
सो हुलाकी सडक कपिलवस्तु र दाङदेउखुरी खण्डको करिब ३५ किमि दुरी निर्माणमा राज्यले ढिलाइ गरेकोले सो विषयमा वास्तविकता अध्ययनका लागि राष्ट्रिय जनमोर्चाका कार्यकारी अध्यक्ष एवम् संविधानसभाका सभासद रश्मिराज नेपालीको नेत्तृव्वमा २०८२ असार २१ गते शनिबार कपिलवस्तुको सो हुलाकी सडक निर्माण रोकिएको चिराईखोला पुलसम्म स्थलगत अवलोकनका लागि पुगेको थियो ।
टोलीमा राजमो दाङदेउखुरी जिल्ला समिति सदस्य नवराज शर्मा, अखिल (छैठौं) का रविन अधिकारी, राजमो गढवा गाउँ कमिटी सदस्य भरत अधिकारी, गढवा गाउ“पालिका कार्यपालिका सदस्य एवम् दलित नेता सूर्य नेपालीसमेतको सहभागिता रहेको थियो ।
