काठमाडौँ । इरानमाथि इजरायल र अमेरिकाले गरिरहेको आक्रमणका विरुद्ध १३ विद्यार्थी सङ्गठनले आज असार १० गते माइतीघर मण्डलामा प्रदर्शन गर्ने भएका हुन् ।
अखिल (क्रान्तिकारी) को कार्यालय बागबजारमा २०८२ असार ९ गते सोमबार बसेको संयुक्त बैठकले सो निर्णय गरेको हो ।
बैठकपछि उनीहरूले प्रेसवक्तव्य जारी गरेका छन् । वक्तव्यमा इरानमाथिको अमेरिका र इजरायली आक्रमणको विरोध गर्दै युद्ध रोक्न माग गरिएको छ । उनीहरूले नारा दिएका छन्– ‘युद्ध रोक’, ‘साम्राज्यवाद मुर्दावाद’, ‘अन्तर्राष्ट्रिय ऐक्यबद्धता जिन्दावाद’ ।
अन्तर्राष्ट्रिय आणविक ऊर्जा एजेन्सीले इरानमाथि तत्काल परमाणु बम बनाउने अवस्था छैन भनेपछि पनि इरानमाथि आक्रमण गरिएकोमा विद्यार्थी सङ्गठनको विरोध छ ।
उनीहरूले त्यसको विरोधमा विश्वव्यापी रूपमा आवाज उठाउन पनि अपिल गरेका छन् ।
प्रेसवक्तव्यमा अखिल (छैठौं) अध्यक्ष सुवास जिसी, अखिल (क्रान्तिकारी) का अध्यक्ष विजयप्रकाश सापकोटा, अनेरास्ववियुका अध्यक्ष महेश श्रेष्ठ, अखिल नेपाल विद्यार्थी युनियनका नरेन्द्र सी, अखिल (क्रान्तिकारी) का अध्यक्ष बीरेन्द्र शाह, एसएसएसएनका अध्यक्ष हिमांशु, अखिल (क्रान्तिकारी) का संयोजक महेश श्रेष्ठ, एसएसयुका अध्यक्ष प्रकाश चाम्लिङ राई, एसएसयुएनका महासचिव अन्जिलहाङ किराती, नेपाल समाजवादी विद्यार्थी युनियनका अध्यक्ष वलबहादर रम्तेल, नेपाल विद्यार्थी फेडरेसनका अध्यक्ष पङ्कजकुमार देव, अनेरास्ववियु (पाँचौँ) की अध्यक्ष पवित्रा आचार्य र अखिल नेपाल विद्यार्थी युनियनका अध्यक्ष मनिष भट्टराईको हस्ताक्षर रहेको छ ।
