काठमाडौँ । गत चैत १५ गते राजावादी तोडफोड तथा आगजानीमा परेपछि बन्द भएको सन्चो उत्पादन जडीबुटी उत्पादन तथा प्रशोधन कम्पनी लिमिटेडले पुनः सुरु भएको छ ।
सञ्चो बजारमा बढी लोकप्रिय भएकाले त्यसलाई प्राथमिकतामा राखी उत्पादन सबैभन्दा पहिला सुरु गरिएको कम्पनीका सूचना अधिकारी धर्मलाल नेपाल बताउँछन् ।
‘दैनिक ५० कार्टुनको हाराहारीमा हाललाई उत्पादन सुरु गरिएको छ’ नेपालले भने– ‘गर्मी सिजनमा बजारको माग पनि यति नै हो ।’
उनका अनुसार जाडोमा सञ्चोको माग केही बढी हुन्छ । हालको बजारलाई ध्यानमा राखी उत्पादन गरिएको हो ।
कम्पनीलाई पुरानो लयमा फर्काउनका लागि अझै छ महिनादेखि एक वर्षसम्मको समय लाग्न सक्ने नेपालको भनाइ छ ।
‘मेसिन खरिद तथा निर्माण गर्नुपर्ने तथा घर बनाउनुपर्नेछ । पुरानै लयमा ल्याउन अझै एक वर्षसम्मको समय लाग्न सक्छ’ उनले भने ।
सन्चो उत्पादनका लागि आवश्यक कच्चा पदार्थ मोरङ, सुनसरी, जारजरकोटलगायतका शाखामा स्टक रहेकाले छोटो समयमा नै उत्पादन सम्भव भएको सूचना अधिकारी नेपाल बताउँछन् ।
२०५६ सालदेखि सञ्चो उत्पादन गर्न थालेको उक्त कम्पनीको सन्चो स्वदेश तथा विदेशमा बढी लोकप्रिय भएको उक्त उत्पादनसँग निजी कम्पनी प्रतिस्पर्धामा जान सकेका छैनन् ।
सञ्चो उत्पादनमा प्रयोग हुँदै आएको स्वचालित मेसिन जलेकाले हाललाई हातेमेसिनबाट नै उत्पादन सुरु गरिएको हो । कम्पनीले पाँच र १० मिलिलिटरमा सञ्चो बजारमा ल्याउने गरेमा हाललाई ५ मिलिलिटर मात्रै उत्पादन गर्दै आएको छ ।
वार्षिक ११ करोड बराबरको सन्चो कम्पनीले बजारमा लैजाने गरेको छ । यो कम्पनीलाई टिकाउने उत्पादनसमेत हो ।
आगजनीका कारण क्षति पुगेको भवनको पुननिर्माणका लागि कम्पनीले १० करोड मागसहितको पत्र अर्थमन्त्रालयमा पठाइसकेको छ । २०३८ सालमा स्थापना भएको उक्त कम्पनीले सञ्चो, सञ्चोबाम, बामतेल, सञ्चो जटा केशतेल, सञ्चो पेन रिलिफ ओयललगायतका उत्पादन बजारमा ल्याइरहेको छ ।
मुलुककै गर्वको रूपमा रहेको उक्त कम्पनीमा राजावादी समर्थकले तोडफोड तथा आगजनी गर्दा करिब २८ करोड बराबरको क्षति भएको थियो । आगजनीबाट केन्द्रका १३ ओटा गाडी, छओटा मोटसाइकल, लाखौँको पर्ने तयारी औषधी तथा कच्चा पदार्थसमेत जलेर नष्ट भएका थिए ।
