काठमाडौँ । औषधीको मूल्यनीतिसम्बन्धी प्रतिवेदनको विरोध गर्दै सुरु भएको आन्दोलन स्थगित भएको छ ।
२०८२ असार १ गते आइतबार स्वास्थ्य तथा जनसङ्ख्यामन्त्री प्रदीप पौडेल र आन्दोलनरत १२ संस्थाका प्रतिनिधिबिच आइतबार छलफल भएपछि आन्दोलन स्थगित भएको हो ।
स्वास्थ्य मन्त्रालयमा भएको छलफलमा मन्त्री पौडेलले आन्दोलनरत पक्षका विषयलाई थप छलफल र परामर्श गरी प्रतिवेदनलाई अन्तिम रूप दिने प्रतिबद्धता जनाएपछि आन्दोलनरत पक्षले विरोधका सबै कार्यक्रम स्थगित गरेका छन् ।
मन्त्रीसँगको छलफलमा मन्त्री पौडेलले पोषराज पाण्डेको अध्यक्षतामा गठित समितिले बुझाएको प्रतिवेदनलाई सबै सरोकारवाला पक्षसँग थप छलफल र परामर्श गरी मात्र अन्तिम रूप दिने प्रतिबद्धता व्यक्त गरे ।
छलफलमा मन्त्री पौडेलले नेपाल सरकार नेपाली जनतालाई सहज रूपमा उचित मूल्यमा गुणस्तरीय औषधि उपलब्ध गराउने सुनिश्चितताप्रति दृढ रहेको पनि बताए । साथै, नेपाली औषधी उद्योगी, आयातकर्ता र व्यवसायीलाई व्यवसायमैत्री वातावरण सिर्जना गर्न मन्त्रालय सधैँ तत्पर रहेको उनले जोड दिए ।
“निकट भविष्यमा सरोकारवालासँग थप छलफल गरी मन्त्रालयले ठोस कदम चाल्ने र आगामी १५ दिनभित्र यो प्रक्रिया सुरु गर्ने प्रतिबद्धता मन्त्रीले व्यक्त गर्नुभएको छ” औषधी, स्वास्थ्य सेवा तथा स्वास्थ्य सामग्री सरोकार समितिद्वारा जारी विज्ञप्तिमा भनिएको छ ।
त्यसैगरी समितिले मन्त्रीद्वारा दिइएको समयसीमालाई ध्यानमा राखेर सङ्घर्षका कार्यक्रम केही समयका लागि स्थगन गरेको जनाएको छ ।
