टेकराज भुसाल, सन्धिखर्क ।
अर्घाखाँचीको भूमिकास्थान नगरपालिका स्वास्थ्य शाखाको आयोजनामा भूमिकास्थान–१ राजिमेमा क्षयरोगको जोखिम समूहमा सक्रिय क्षयरोगको खोज–पड्तालसम्बन्धी अभिमुखीकरण कार्यक्रम सम्पन्न भएको छ ।
“डट्स विधिबाट औषधी खुवाऔँ, क्षयरोग निको गराऔँ” भन्ने नारासहित २०८२ असार २ गते सोमबार सो कार्यक्रम सम्पन्न भएको हो ।
कार्यक्रममा आधारभूत स्वास्थ्य केन्द्र भूमिकास्थान–२ का इन्चार्ज श्याम चुँदालीले क्षयरोग के हो ? यसले कसरी आक्रमण गर्छ ? यसको रोकथामको उपाय ? यसको इतिहासलगायतका विषयमा प्रशिक्षण दिनुभएको थियो ।
ढाकावाङ स्वास्थ्यचौकी प्रमुख रन्जिता रायमाझी र लिसा विकले सहजीकरण गर्नुभएको सो कार्यक्रममा वडा नं. १ का अध्यक्ष गोपालप्रसाद खनाल, वडासदस्य चमकली सार्की, भूमिकास्थान युवा सञ्जालका संयोजक तथा पत्रकार टेकराज भुसाल, स्थानीय टोल विकास समितिका प्रतिनिधि, महिला स्वास्थ्य स्वयम्सेविका तथा स्थानीयको उपस्थिति रहेको थियो ।
स्वास्थ्य सचेतना अभिवृद्धि गर्ने उद्देश्यद्वारा सम्पन्न यस कार्यक्रममार्फत् समुदायमा क्षयरोगको पहिचान, रोकथाम र उपचारको विषयमा महत्त्वपूर्ण जानकारी प्रदान गरिएको थियो ।
