काठमाडौँ । क्यान्सर विजेताहरूको संस्था नेपाल क्यान्सर सर्भाभर्स सोसाइटीले आफ्नो अड्तिसौँ दिवस विविध कार्यक्रम मनाउने भएको छ ।
सोसाइटीका अध्यक्ष प्रमिता खनालले २०८२ जेठ १५ गते बिहीबार प्रेसवक्तव्य जारी गर्दै सो जानकारी दिनुभएको हो ।
कार्यक्रम मध्यबानेश्वरको सनराइज क्याफेमा जेठ १८ गते तदनुसार जुन १, २०२५ का दिन बिहान ११ बजेदेखि सुरु हुनेछ ।
जुन महिनाको पहिलो आइतबार सर्भाइभर्स दिवसको रूपमा विश्वव्यापी रूपमा मनाइने जानकारी दिँदै क्यान्सर सर्भाइभर्स सोसाइटीले मनाउन थालिएको बताइएको छ ।
प्रेसवक्तव्यमा भनिएको छ– “नोभेम्बर २०, १९८७ का दिन न्यूमेक्सिकोमा क्यान्सर सर्भाइभर्सको दोस्रो अन्तर्राष्ट्रिय सम्मेलनको निर्णयअनुसार जुन ५, १९८८ मा पहिलो राष्ट्रिय क्यान्सर सभाइभर्स दिवस मनाइएको थियो । त्यो ऐतिहासिक परम्परालाई निरन्तरता दिँदै यो वर्ष जुन १ का दिनअ अड्तिसौँ क्यान्सर सभाइभर्स दिवस सम्पन्न गरिँदै छ । क्यान्सरको इतिहास भएकाहरूको सम्मान, क्यान्सरबाट बाचेकाको चुनौतीप्रति जागरुकता र भविष्यका लागि प्रेरणादायी आशाको लागि सर्भाइभर्स दिवस मनाउन लागिएको हो ।”
विश्वव्यापी रूपमा अहिले पनि पाँच करोड ३५ लाख मानिस क्यान्सर विजेताको रूपमा रहेको जानकारी दिँदै प्रेसवक्तव्यमा यसपटक क्यान्सर सर्भाइभर तथा वरिष्ठ गायिका मीरा राणाज्यूको हातबाट साहसिक सर्भाइभर्स तथा साइकलयात्री नमिता बस्नेतलाई सम्मानित गर्ने, विभिन्न सभाइभर्सको लुकेको प्रतिभा प्रस्फुटित गर्ने लक्ष्य लिइएको उल्लेख छ ।
