काठमाडौँ । १२ वर्षीया प्रदिप्ता बडूले अङ्ग्रेजी भाषामा लेखेको ‘डेड अर अलाइभ’ नामक उपन्यास सार्वजनिक भएको छ । भाषा आयोगका पूर्वअध्यक्ष प्राडा लवदेव अवस्थीले एक कार्यक्रमबीच उक्त कृतिको विमोचन गरेका हुन् ।

पाठशाला फाउन्डेसन नेपालमा कक्षा ८ मा अध्ययनरत प्रदिप्ताको उक्त उपन्यास आवरण प्रकासनले प्रकाशित गरेको हो । सो उपन्यास लेखिका बडूले कोभिड–१९ को समयमा भोगेको अनुभूतिमा आधारित सचित्र अध्याय पुस्तक हो । सो अवसरमा प्राडा अवस्थीले कोभिड–१९ को बेला बाल मस्तिष्कले भोगेको कटु अनुभवलाई प्रदिप्ताले कलात्मक तरिकाले प्रस्तुत गरेको र उनमा प्रतिभाको प्रवाह प्रचुर रहेको बताए ।

बाल साहित्य समाजका अध्यक्ष विजयराज आचार्यले देशका कुनाकुनामा रहेका बाल प्रतिभाको खोजी गरी अगाडि ल्याउनुपर्नेमा जोड दिए । बाल वाङ्मय तथा अनुसन्धान केन्द्रका अध्यक्ष अनन्त वाग्लेले उपन्यासमा साहसिक यात्रा, मानवीय समवेदना र स्वैरकल्पनाको सुन्दर मिश्रण रहेको बताए । आवरण प्रकाशनका प्रबन्ध निर्देशक रमेश पौडेलले प्रदिप्तामा अद्वितीय लेखन कलाको क्षमता रहेको विचार राख्दै उनलाई प्रकाशकका तर्फबाट प्रशंसापत्र प्रदान गरे ।

क्याप्टेन वेद उप्रेतीले प्रदिप्ता सुन्दर सुदूरपश्चिमबाट फक्रेकी बालप्रतिभा भएको बताए । कृतिकारका पिता कैलाश बडूले छोरी सानैदेखि भावुक स्वभावकी र आँटेको कुरा गरेरै छाड्ने आँटिली भएको बताए । पाठशाला नेपाल फाउन्डेसनका संस्थापक इश्वरमणि अधिकारीले आफ्नो विद्यालयमा प्रदिप्ताजस्ता बाल प्रतिभा हुनुले विद्यालयको गरिमा बढाएको विचार राखे । साहित्यकार जया बुढाथोकीले उपन्यास निकै पठनीय भएको बताइन् । विद्यालयका प्रधानाध्यापक विश्वनाथ कँडेलले प्रदिप्ता अध्ययनका साथै अतिरिक्त क्रियाकलापमा पनि अब्बल रहेको बताए ।

उपन्यासकार प्रदिप्ताले आफ्नो लेखकीय अनुभूति सुनाउँदै पहिलो कृति बुबा कैलाशको जन्मदिनमै उपहार दिन पाएकामा गौरवको अनुभूति मिलेको बताइन् । साहित्यकार एवं कृतिकारकी हजुरआमा हेमन्ती जोशीले नातिनीले आफ्नै पदचिन्ह पच्छ्याउँदै साहित्यिक यात्रा सुरु गरेकामा खुशी व्यक्त गरिन् । २० खण्डमा विभक्त उक्त उपन्यासमा अक्रिनको कलाकारिता रहेको छ । रासस