धनगढी । राष्ट्रिय जनमोर्चाका अध्यक्ष चित्रबहादुर केसीले गणतन्त्र जोगाउन गणतन्त्र पक्षधर मिल्नुको विकल्प नभएको बताउनुभएको छ ।

राष्ट्रिय जनमोर्चा, सुदूरपश्चिम प्रदेश समितिले शनिबार (जेठ ३ गते) धनगढीमा आयोजना गरेको ‘वर्तमान राजनीतिक परिस्थिति र गणतन्त्र रक्षाको प्रश्न’ विषयक अन्तरक्रिया कार्यक्रममा अध्यक्ष केसीले सो कुरा बताउनुभएको हो ।

उहाँले मतभेदका विषयलाई कायम राख्दै गणतन्त्रको पक्षमा एकतावद्ध हुन आग्रह गर्नुभयो ।

‘हाम्रा आ–आफ्ना दृष्टिकोण छन् । आपसी मतभेद छन् तर, तिनका बाबजुद गणतन्त्र जोगाउन गणतन्त्रका पक्षधर दलहरू एकजुट हुनुपर्छ’ केसीले भन्नुभयो, ‘अहिले गणतन्त्रमाथि देखिएको कालो बादल सामान्य होइन । प्रतिगमनको खतरालाई हल्का रुपमा लिनु हुँदैन ।’

अध्यक्ष केसीले सत्ता सञ्चालन गरिरहेका दलहरूलाई जनतामा बढिरहेको आक्रोश र असन्तोषको ख्याल गरेर सुध्रिन आग्रह गर्नुभयो ।

अन्तरक्रियाको विषयवस्तु प्रस्तुत गर्दै राजमो महासचिव मनोज भट्टले २०६२/०६३ सालयता राजावादीको सबैभन्दा बढी मनोबल बढेको उल्लेख गर्दै सत्ताधारी दलहरूको भ्रष्ट प्रवृतिका कारण प्रतिगमनले टाउको उठाउने मौका पाएको बताउनुभयो ।

उहाँले आफ्नो पार्टीले प्रतिगमनको खतराविरुद्ध देशव्यापी अभियान सञ्चालन गरिहेको भन्दै अन्य दललाई पनि कार्यक्रम गर्न आग्रह गर्नुभयो ।

राजमोले हाल प्रतिगमनको खतराविरुद्ध पालिकास्तरका कार्यक्रमहरू गरिरहेको छ ।

वरिष्ठ वामपन्थी नेता आरसी भट्टको आतिथ्यता रहेको कार्यक्रममा नेपाली कांग्रेसका केन्द्रीय सदस्य नृपबहादुर वड, नेकपाका केन्द्रीय सदस्य भरत बम, नेकपा एमाले सुदूरपश्चिम प्रदेश समिति अध्यक्ष कृष्णप्रसाद जैशी, नेकपा एकीकृत समाजवादी सुदूरपश्चिम प्रदेश समितिका उपाध्यक्ष गोरख साउद, सुदूरपश्चिम प्रदेश सभा सदस्य डा. तारा जोशी, सुदूरपश्चिमका पूर्वमन्त्री पूर्णा जोशीले प्रतिगमनको खतराबारे आ–आफ्ना धारणा राख्नुभएको थियो ।

यस्तै, नाष्ट कलेजका निर्देशक शिवहरि मुडभरी, सुदूरपश्चिम बहुमुखी क्याम्पसका क्याम्पस प्रमुख योगराज आचार्य, सुप विश्वविद्यालय बोर्ड समिति सदस्य हरिकृष्ण कडायत, कैलाली बहुमुखी क्याम्पसका प्राध्यापक डा. गणेश प्रसाद जोशी, इन्सेक, सुदूरपश्चिम प्रदेश संयोजक खडकराज जोशी, पञ्चोदय माध्यमिक विद्यालयका पूर्व प्रधानाध्यापक पदम सिंह कुँवर, ऐश्वर्य विद्या निकेतनका प्राचार्य सन्जय पन्तले पनि धारणा राख्नुभएको थियो ।

कार्यक्रममा उठेका विषयवस्तु उपर अध्यक्ष केसीले अन्तमा प्रस्टीकरण दिनुभएको थियो भने राजमो सुदूरपश्चिम प्रदेश अध्यक्ष नन्दराज भट्टले धन्यवाद ज्ञापन गर्नुभएको थियो ।

राष्ट्रिय जनमोचा सुदूरपश्चिम प्रदेश समितिका उपाध्यक्ष हरिकृष्ण पाण्डेको अध्यक्षतामा सम्पन्न अन्तरक्रिया कार्यक्रमको सञ्चालन प्रदेश सदस्य डबल बोगटी र स्वागत अर्का प्रदेश समिति सदस्य रामबहादुर कार्कीले गर्नुभएको थियो ।