गोपालप्रसाद भट्टराई, सन्धिखर्क ।
नेकपा (मसाल) ५ नम्बर ब्युरो प्रवक्ता तिलक जिसीले अहिलेको सरकार नै नेपाल र नेपालीको हितमा नभएको आरोप लगाउनुभएको छ ।
गणतन्त्रको रक्षा, प्रतिगमनका विरुद्द सङ्घर्ष र सङ्घीयता खारेजीको निम्ति राष्ट्रिय जनमोर्चा अर्घाखाँचीले २०८२ वैशाख ३० गते मङ्गलबार सन्धिखर्क शान्तिबगैँचामा आयोजना गरेको चेतनासभालाई सम्बोधन गर्दै उहाँले यस्तो बताउनुभएको हो ।
ऋण काढेर जिउ पाल्नेबाहेक सरकारले अरू काम नगरेको जिकिर गर्दै उहाँले सरकारले देशमा निराशा छरेको पनि दाबी गर्नुभयो ।
भ्रष्टाचारी र अपराधीलाई संरक्षण गर्ने, युवाजति विदेश बेच्ने अनि आफै सडकमा आएर रमिता देखाउने सरकारको गलत रवैयाले गणतन्त्रको विरुद्धमा आवाज बढ्न थालेको उहाँको धारणा छ ।
अर्कोतर्फ, पढ्न, बोल्न खोज्दा दमन गर्ने, चेलीहरूको बलात्कार गर्ने, नयाँ व्यवस्थाको वकालत गर्दा हत्या गर्ने राजसंस्थाको माग गर्नेहरूको माग पूरा नहुने उहाँको तर्क थियो ।
अन्धकारबाट उज्यालोमा आएका नेपालीहरू फेरि अध्याँरोमा फर्किन नसक्ने भन्दै नेता जिसीले लामो सङ्घर्ष र बलिदानीबाट प्राप्त गणतन्त्रको विकल्प गणतन्त्र नै हुने तर्क गर्नुभयो ।
फरक प्रसङ्गमा नेता जिसीले नेपालमा सङ्घीय व्यवस्था फेल भइसकेको दाबी गर्नुभयो ।
नेपालको राजनितिक, आर्थिक वा भौगोलिक कुनै पनि दृष्टिकोणले सङ्घीयता असफल सिद्ध भएको उहाँको तर्क थियो ।
सङ्घीयता नफाले कालान्तरमा यसले देशलाई भड्खालोमा हाल्ने भन्दै उहाँले विकास र समृद्धिका निम्ति स्थानीय तहलाई मजबुत बनाउनुपर्नेमा जोड दिनुभयो ।
कार्यक्रममा मन्तव्य राख्दै अखिल नेपाल किसान महासङ्घ (अप्फा) का महासचिव तुलसी सापकोटाले सत्तामा बस्नेहरूको गलत प्रवृतिका कारण नागरिक निराश भएको र त्यही मौकामा राजावादी सल्बलाएको बताउनुभयो ।
राजमो सन्धिखर्क नगर समितिका अध्यक्ष गोविन्द बिसीको अध्यक्षता, राजमो नगर कोषाध्यक्ष लीला भुसालको स्वागत मन्तव्य र नगर सचिव बसन्त खड्काको सञ्चालनमा सम्पन्न कार्यक्रममा राजमो अर्घाखाँची अध्यक्ष थम्मन केसी र अखिल नेपाल महिला सङ्घकी केन्द्रीय उपाध्यक्ष कल्पना पोख्रेलले पनि मन्तव्य राख्नुभएको थियो ।
कार्यक्रममा बोल्दै उहाँहरूले मसानघाटमा अन्तिम संस्कार गरिसकिएको राजा ब्युँताउने कुरा दिवासपना मात्रै हुने तर्क गर्नुभयो ।
सङ्घीयता खारेज गरी मुलुकको विकास र समृद्धिको निम्ति सबै गोलबन्द हुनुपर्ने उहाँहरूको जोड थियो ।
काङ्ग्रेस, एमाले र माओवादीलगायतका पार्टी राष्ट्रघात गर्नको लागि तँछाडमछाड गर्ने गरेको नेताहरूको आरोप छ ।
अहिलेको सरकार जनताको लागि नभएर अपराधी, भ्रष्टाचारी, शैक्षिक माफिया र भूमाफियाको लागि बनेको उहाँहरूको जिकिर थियो ।
कार्यक्रममा राजमो लुम्बिनी प्रदेश समितिका सल्लाहकार शेरबहादुर बिसी, महिला सङ्घकी महासचिव शकुन्तला राना, राजमो अर्घाखाँचीका सचिव बाबुराम पन्थी, नेकपा (मसाल) का जिल्ला प्रवक्ता पशुपति ढकाल, सचिवालय सदस्यद्वय भीमलाल आचार्य र कमलप्रसाद घिमिरेलगायतका नेताहरूको आतिथ्य रहेको थियो ।
