काठमाडौँ । नेकपा (मसाल) का महामन्त्री मोहनविक्रम सिंहले दासता विरुद्ध मजदुर आन्दोलनको महत्त्वपूर्ण दिनको रूपमा मे दिवस रहेको धारणा व्यक्त गर्नुभएको छ ।
अखिल नेपाल ट्रेड युनियन महासङ्घ (अन्टुक) केन्द्रीय कार्यालयद्वारा २०८२ वैशाख १७ गते बिहीबार राष्ट्रिय जनमोर्चा केन्द्रीय कार्यालयको सभाकक्षमा आयोजित एक सय छत्तिसौँ मे दिवसको कार्यक्रममा मन्तव्य राख्दै उहाँले यस्तो अभिव्यक्ति राख्नुभएको हो ।
‘मजदुर वर्ग समाजको सञ्चालक शक्ति भए पनि पुँजीवादका कारण मजदुर वर्गमाथि दासता लादिएको छ’ उहाँले भन्नुभयो– ‘दासता विरुद्ध मजदुर आन्दोलनको महत्त्वपूर्ण दिन मे दिवस हो ।’
मन्तव्यको क्रममा उहाँले पछिल्लो समयमा मजदुरहरूले बढी अधिकार पाएको बताउँदै उनीहरूमा अर्थवादी प्रवृत्ति देखा परेकोमा चिन्ता व्यक्त गर्नुभयो ।
उहाँले भन्नुभयो– ‘पछिल्लो समयमा मजदुरहरू अर्थवादी भएका छन् । राजनीतिप्रति उनीहरूको ध्यान छैन ।’
महामन्त्री सिंहले मजदुरमा पुँजीवादको सेवा गरेर आफ्नो जीवन समृद्ध बनाउनेतर्फ ध्यान गएको धारणा राख्नुभयो ।
यिनै कारणले विश्व कम्युनिस्ट आन्दोलन कमजोर बनेको र फलस्वरूप नेपालको कम्युनिस्ट आन्दोलन पनि कमजोर रहेको बताउनुभयो ।
मजदुर आन्दोलनमा प्रष्ट दृष्टिकोणको अभाव रहेको तर्क गर्दै उहाँले यिनै कारण मजदुर आन्दोलन शिथिल बनेको धारणा राख्नुभयो ।
लेनिनले मजदुर आन्दोलनमा देखा परेको अर्थवाद र मजदुर कुलीनतन्त्रको विरोध गरेको महामन्त्री सिंहले स्मरण गर्नुभयो ।
उहाँले सही दर्शन र क्रान्तिकारी नीतिको आधारमा मात्रै मजदुर आन्दोलनमा अगाडि बढ्ने विश्वास व्यक्त गर्नुभयो ।
महामन्त्री सिंहले भन्नुभयो– ‘सही दृष्टिकोण निर्माणमा हाम्रो ध्यान जानुपर्दछ ।
