काठमाडौँ । राष्ट्रिय जनमोर्चाले सङ्घीयता खारेजीका लागि काठमाडौँकेन्द्रित आन्दोलनको समापन चैत २८ गते हुने जानकारी दिएको छ ।
काठमाडौँमा बढ्दै गएको प्रदूषणको अवस्थालाई मध्येनजर गर्दै चैत ३० गते समापन गर्ने भनिएको कार्यक्रम दुई दिनअघि समापन हुन थालेको हो ।
अध्यक्ष चित्रबहादुर केसीको हस्ताक्षरमा २०८१ चैत २५ गते सोमबार प्रेसवक्तव्य जारी गर्दै राजमोले सङ्घीयता विरोधी राजधानीकेन्द्रित आन्दोलन सफल पार्न काठमाडौँ आउनुहुने तथा सबै प्रकारले सहयोग गर्नुहुने सबैप्रति धन्यवाद ज्ञापन गरिएको छ ।
त्यस्तै, वक्तव्यमा राजमोले शिक्षकको आन्दोलनप्रति गम्भीर नभएको सरकारको आलोचना गरिएको छ । सरुवाबढुवाको अधिकार स्थानीय तहलाई नदिने गरी शिक्षा ऐन ल्याउन राजमोले सरकारसित माग गरेको हो ।
वरिष्ठ पत्रकार भैरव रिसालको निधन भएकोमा वक्तव्यमा शोकमन्तव्य व्यक्त गर्दै शोकसन्तप्त परिवारप्रति समवेदना व्यक्त गरिएको छ ।
यस्तो छ, प्रेसवक्तव्यको पूर्ण पाठ :
“कतिपय जरुरी महत्त्वका विषयमा जानकारी गराउन र पार्टीको धारणा स्पष्ट पार्न यो वक्तव्य जारी गरिएको छ ।
१. हाम्रो पार्टी राष्ट्रिय जनमोर्चाले गणतन्त्र र राष्ट्रियताको रक्षा तथा सङ्घीयताको खारेजीका लागि यही चैत २४ देखि ३० गतेसम्म सप्ताहव्यापी राजधानीकेन्द्रित आन्दोलनको घोषणा गरेको थियो । राजधानीकेन्द्रित आन्दोलन सफल पार्न ठुलो उत्साहका साथ विभिन्न बाधाअवरोधका बाबजुद पनि देश तथा प्रवासबाट पार्टीका समर्थक, शुभचिन्तक, नेता, कार्यकर्ताहरू ठुलो सङ्ख्यामा काठमाडौँ आइसक्नुभएको छ । चैत २४ गते आन्दोलनको उद्घाटन सम्पन्न भई आज दोस्रो दिनको कार्यक्रम पनि भव्यताका साथ सम्पन्न भइसकेको छ । सङ्घीयता विरुद्धको राजधानीकेन्द्रित आन्दोलनलाई सफल पार्न भौतिक, नैतिक तथा आर्थिक रूपले सहयोग गर्नुहुने सम्पूर्ण न्यायप्रेमी जनसमुदायलाई हामीले धन्यवाद ज्ञापन गर्दछौँ ।
२. अहिले काठमाडौँ विश्वकै प्रदूषित सहरमध्ये पहिलो स्थानमा पुगेको तथ्याङ्क सार्वजनिक भइरहेका छन् । दिनप्रतिदिन थप प्रदूषण बढिरहेको छ । यो अवस्था रहिरहेमा प्रदूषणका कारण जनताको स्वास्थ्यमा कैयौँ गम्भीर र दीर्घकालीन रूपमा नकारात्मक असर पर्ने सम्भावनातर्फ कैयौँ विज्ञले सचेत गराइरहेका छन् । स्वयम् सरकारले विद्यमान प्रदूषित अवस्थामा जनताको स्वास्थ्य, सुरक्षाका लागि कैयौँ सतर्कता अपनाउनेबारे छलफल अगाडि बढाएको छ । बढ्दो प्रदूषणका बिच सप्ताहव्यापी आन्दोलनलाई सञ्चालन गर्दा कैयौँ स्वास्थ्यसँग सम्बन्धित जटिलता उत्पन्न हुने खतरा देखिएको कुरा मध्येनजर गर्दै आजै बसेको बैठकले आन्दोलनको अवधि २ दिन घटाई ५ दिन मात्र कायम राख्ने निर्णय गरेका छौँ । जसअनुसार राजधानीकेन्द्रित आन्दोलनको समापन चैत ३० गते नभएर चैत्र २८ गते नै हुनेछ । कार्यक्रमको स्वरूपमा आवश्यकताअनुसार परिवर्तन गर्नुपर्ने हुन्छ । कार्यक्रमको स्वरूप परिवर्तन भए पनि सङ्घीयता विरुद्धको सङ्घर्ष प्रादेशिक संरचना खारेज नभएसम्म जारी रहने प्रतिबद्धता पनि यही वक्तव्यमार्फत् दोह¥याउन चाहन्छौँ ।
३. बदलिएको राजनीतिक व्यवस्थाअनुरूपको शिक्षा ऐन ल्याउन सरकारले गरेको विलम्बका विरुद्ध गत सालदेखि नै शिक्षकले आफ्नो पेसागत हकहितसहित आन्दोलन गरिरहेका छन् । उक्त आन्दोलनप्रति राष्ट्रिय जनमोर्चाले ऐक्यबद्धता प्रकट गर्दछ । शिक्षकका पेसागत मागलाई सम्बोधन गर्नुका साथै बदलिएको राजनीतिक व्यवस्थाअनुरूपको शिक्षा ऐन ल्याउन सरकारलाई जोड दिन्छौँ । शिक्षा ऐन ल्याउँदा निजी शिक्षा क्षेत्रलाई कानुनको दायराभन्दा बाहिर राख्ने कुनै पनि प्रकारको जालझेल वा आलटालले शिक्षा र स्वास्थ्यलाई निःशुल्क गर्ने संवैधानिक व्यवस्थाको कार्यान्वयनमा समेत बाधा पुग्नेछ । शिक्षकको सरुवाबढुवा वा विभागीय कारबाहीको अधिकार स्थानीय तहलाई हुनुहुँदैन । यसको अर्थ शिक्षा क्षेत्रको सञ्चालन स्थानीय तहको क्षेत्राधिकारबाट खोसिनुपर्छ भन्ने होइन ।
४. पत्रकार भैरव रिसालको २०८१ चैत २४ गते भएको मृत्युको समाचारले हामीलाई निकै दुःख लागेको छ । दिवङ्गत भैरव रिसालप्रति हार्दिक श्रद्धाञ्जली प्रकट गर्दैै सोकसन्तप्त परिवारप्रति हार्दिक समवेदना व्यक्त गर्दछौँ । उहाँको मृत्युले पत्रकारिता तथा बाम आन्दोलनलाई क्षति पुगेको छ ।”
