काठमाडौँ । नेपाल शिक्षक महासङ्घले आफ्ना मागसहितको ज्ञापनपत्र बुझाएपछि राष्ट्रिय जनमोर्चाले ऐक्यबद्धता प्रकट गरेको छ ।
केन्द्रीय सल्लाहकार आनन्द शर्माले २०८१ चैत ४ गते सोमबार कपनस्थित राजमो केन्द्रीय कार्यालयमा ज्ञापनपत्र बुझ्दै ऐक्यबद्धता व्यक्त गर्नुभएको हो ।
‘शिक्षक महासङ्घको आन्दोलनका मागप्रति हामी जानकारी छौँ’ महासङ्घको ज्ञापन बुझेपछि उहाँले भन्नुभयो– ‘तपाईंहरू आन्दोलनप्रति पूर्ण रूपमा ऐक्यबद्धता जनाउन चाहन्छौँ ।’
राज्य जिम्मेवार नहुँदा विभिन्न जनवर्गका समस्या बढ्दो क्रममा रहेको स्मरण गर्दै जनआन्दोलनका उपलब्धिहरू गणतन्त्र, धर्मनिरपेक्षता, विकेन्द्रीयता तथा समावेशितजस्ता धरापमा पर्न थालेको धारणा व्यक्त गर्नुभयो ।
राजमो स्थायी प्रतिपक्षको भूमिकामा रहेको बताउँदै नेता शर्माले भन्नुभयो– ‘तपाईंहरूको मागलाई राजमोले सदन र सडक दुवै स्थानबाट उठाउनेछौँ ।’
नेकपा (मसाल) का प्रवक्ता रामप्रकाश पुरी, राजमो केन्द्रीय कोषाध्यक्ष मधु क्षेत्री र राजमो केन्द्रीय सदस्य सुधा शर्मासमेतको उपस्थिति रहेको उक्त कार्यक्रममा आन्दोलनकारीको तर्फबाट सोमनाथ गिरी, सानोभाइ कार्की, पुष्प कुँवर, कल्पना पनेरू, होमकुमार थापालगायतले आन्दोलनको विषयवस्तुबारे जानकारी गराउनुभएको थियो ।
पछिल्लो समयमा शिक्षक महासङ्घले फागुन २७ गतेदेखि दोस्रो चरणको कार्यक्रम सञ्चालन गरिरहेको छ । त्यस क्रममा फागुन २७ गते नेपाली काङ्ग्रेसको केन्द्रीय कार्यालयमा, फागुन २८ गते नेकपा (एमाले) को केन्द्रीय कार्यालयमा, चैत १ गते नेकपा (माओवादी केन्द्र) को केन्द्रीय कार्यालयमा, चैत २ गते नेकपा (एकीकृत समाजवादी) को केन्द्रीय कार्यालयमा र चैत ३ गते राष्ट्रिय प्रजातन्त्र पार्टीको केन्द्रीय कार्यालयमा धर्नासहित ज्ञापनपत्र बुझाइसकेको छ ।
सोमबार राजमोसँगै जनता समाजवादी पार्टी र लोकतान्त्रिक समाजवादी पार्टीको केन्द्रीय कार्यालयमा धर्ना दिएको छ ।
चैत ५ गते जनमत पार्टी, नागरिक उन्मुक्ति पार्टी र राप्रपा नेपालको कार्यालयमा धर्ना दिने कार्यक्रम रहेको छ ।
घोषित कार्यक्रमअनुसार चैत ५ गतेसम्म सङ्घीय सांसदसित भेटेर आफ्ना माग प्रस्तुत गर्ने कार्यक्रम रहेको छ ।
महासङ्घले चैत ७ गतेदेखि १५ गतेसम्म रिले अनसन गर्ने तथा चैत २० गतेदेखि काठमाडौँमा शैक्षिक संस्था बन्द गरी सडक आन्दोलन गर्ने महासङ्घले जनाएको छ ।
