काठमाडौँ । पोखरास्थित पृथ्वीनारायण क्याम्पसका निर्वाचन अधिकृतले दलित समुदायमाथि चोट पुग्ने अभिव्यक्ति दिएपछि अखिल (छैठौं) ले विरोध गरेको छ

अध्यक्ष सुवास जिसीको हस्ताक्षरमा २०८१ चैत ३ गते आइतबार प्रेसवक्तव्य जारी गर्दै युनियनले सो घटनाको विरोध गरेको हो ।

स्ववियु निर्वाचनको सन्दर्भमा बसेको बैठकमा निर्वाचन अधिकृत एक जना प्राध्यापकले नै यस्तो अभिव्यक्ति दिएपछि युनियनले त्यसप्रति विरोध जनाउँदै आगामी दिनमा यस्ता कार्य नदोहोऱ्याउन आग्रहसमेत गरेको छ ।

प्रेसवक्तव्यमा अगाडि भनिएको छ :

“गत २०८१ चैत १ गते पृथ्वीनारायण क्याम्पस पोखरामा स्वतन्त्र विद्यार्थी युनियनको निर्वाचनको सन्दर्भमा आयोजित क्याम्पस निर्वाचन समितिको एउटा बैठकको छलफलमा त्यहाँका प्रमुख निर्वाचन अधिकृत प्राध्यापक रामचन्द्र पोख्रेलले सिङ्गो दलित समुदायमाथि चोट पुग्ने अभिव्यक्ति दिएकोप्रति हाम्रो सङ्गठनको गम्भीर ध्यानाकर्षण भएको छ ।

शैक्षिक अध्ययन र अनुसन्धान हुने थलोमा प्राज्ञबाट नै आउने यस प्रकारका विभेदयुक्त दृष्टिकोण र व्यवहारले हामीलाई स्तब्ध बनाएको छ । हामीले आगामी दिनमा यस प्रकारका कार्य नदोहोऱ्याउन र सचेत रहनसमेत आग्रह गर्दछौँ ।”