काठमाडौँ । अखिल (छैठौं) ले चैत ५ गतेको स्ववियु निर्वाचन सुनिश्चित गर्न माग गरेको छ ।
त्रिभुवन विश्वविद्यालय केन्द्रीय क्याम्पसलगायत देशका कैयौँ क्याम्पसमा ठुला भनिने विद्यार्थी सङ्गठनकै गतिविधिले सो अवस्था देखा परेको भन्दै युनियनले सो माग गरेको हो ।
अध्यक्ष सुवास जिसीको हस्ताक्षरमा २०८१ चैत ३ गते जारी प्रेसवक्तव्यमा ठुला भनिएका विद्यार्थी सङ्गठनले आफूले हार्ने भएपछि ताल्चा लगाउने, प्राध्यापकलाई धम्की दिने, असामाजिक तत्त्वलाई सक्रिय बनाउने, विपक्षी विद्यार्थीसित प्रतिशोध साध्नेजस्ता काम गरेको उल्लेख छ ।
विद्यार्थी, क्याम्पस प्रशासन र सरोकारवाला पक्षसित स्ववियु निर्वाचनको सुनिश्चितताको आग्रह गरिएको प्रेसवक्तव्यको पूर्ण पाठ यस्तो छ :
“आगामी चैत ५ गते त्रिभुवन विश्वविद्यालय मातहतका आङ्गिक एवम् सम्बन्धनप्राप्त क्याम्पसमा निर्वाचन हुँदैछ । दुःखको कुरा त्रिवि केन्द्रीय क्याम्पसलगायतका कैयौँ क्याम्पसमा अहिलेसम्म पनि निर्वाचन अनिश्चित भएको छ । जिम्मेवार र ठुला भनिने विद्यार्थी सङ्गठनका गलत क्रियाकलापको सिकार अहिले पनि कैयौँ क्याम्पस बनेका छन् ।
हाम्रो सङ्गठन हरेक क्याम्पसमा स्ववियुको सुनिश्चितता चाहन्छ । क्याम्पसमा विद्यार्थीको राजनैतिक चेतना र नेतृत्व विकासको अपेक्षा राख्दछ । कमजोर हुँदै गरेको विद्यार्थी राजनीति र बढ्दो राजनैतिक वितृष्णाले देश गलत दिशातिर मोडिने खतरा उत्पन्न भएको छ । युवामा सही राजनैतिक चेतनाको विकास गराउने संस्थालाई विद्यार्थी सङ्गठनकै गलत गतिविधिले धरासायी बनाउँदै लगेको छ । हामीले सबै विद्यार्थी सङ्गठनलाई जिम्मेवार र अनुशासित बन्न अनुरोध गर्दछौँ ।
आफूले हार्ने भएपछि ताला लगाउने, प्राध्यापकलाई धम्की दिने, ट्यापे मुन्द्रे लगेर क्याम्पसमा नचाउने, विपक्षी विद्यार्थीमाथि प्रतिशोध साँध्नेजस्ता गतिविधिले कुनै पनि सङ्गठनलाई फाइदा पुग्दैन । त्यो गम्भीर विद्यार्थी विरोधी कार्य हो । यस्ता कार्य सर्वथा भर्त्सनायोग्य र निन्दनीय छन् । हामीले देशका विभिन्न क्याम्पसमा भएका यस प्रकारका अराजक गतिविधिको विरोध गर्दछौँ ।
अन्तमा, हामीले पुनः सम्पुर्ण विद्यार्थी सङ्गठन, त्रिभुवन विश्वविद्यालय, क्याम्पस प्रशासन, निर्वाचन समिति, प्राध्यापक, विद्यार्थी र सम्पूर्ण सरोकारवालालाई स्ववियु निर्वाचनको सुनिश्चितता गर्न र समयमै निर्वाचन सम्पन्न गर्न हार्दिक अनुरोध गर्दछौँ ।”
