धनगढी । कैलालीको सेती प्रादेशिक अस्पतालको आइसोलेसनमा उपचाररत एक बिरामीको मृत्यु भएको छ ।

कोरोना भाइरस (कोभिड–१९) संक्रमणको आशंकामा सेती अस्पतालको आइसोलेसनमा भर्ना गरिएका गौरीगंगा नगरपालिका–७ का ५५ वर्षीय पुरुषको मृत्यु भएको हो । उनको कोरोना परीक्षणको रिपोर्ट आउन बाँकी छ।

सेती प्रादेशिक अस्पतालका सूचना अधिकारी दिलिप कुमार श्रेष्ठका अनुसार बिरामीमा कोरोनासँग मिल्दोजिल्दो लक्षण देखिएपछि आइसोलेसनमा भर्ना गरिएको थियो । भर्ना गर्ने बेला उनमा मृगी जस्तो कम्पन आउने, फिज फाल्ने भएको थियो ।

भारतको महाराष्ट्रबाट फर्किएका उनलाई कोरोना आशंकामा उनी जेठ १३ गते मंगलवार बेलुका सेती प्रादेशिक अस्पतालको आइसोलेसनमा भर्ना गरिएको थियो । मृतकको पीसीआर परीक्षणका लागि नमूना संकलन गरेर प्रयोगशालामा पठाइएको छ।

अहिले सेती प्रादेशिक अस्पतालको आइसोलेसनमा बैतडीका चार र अछामका दुई जना गरी छ जना संक्रमितको उपचार जारी छ ।

सुदूरपश्चिममा कोरोना संक्रमितको संख्या १७ पुगेको छ । उनीहरुमध्ये बैतडी र डडेल्धुरा एक/एक जनाको जिल्ला अस्पताल बैतडी र डडेल्धुरा अस्पताल तथा कैलालीका चार जनाको टिकापुर अस्पतालमा उपचार भइरहेको छ ।

वडाध्यक्षको निधन, कोरोना परीक्षणको तयारी
कञ्चनपुरको कृष्णपुर नगरपालिका–७ का वडाध्यक्ष कल्लु रानाको निधन भएको छ । हृदयाघातका कारण वडाध्यक्ष रानाको निधन भएको जनाइएको छ ।

नगरपालिकाकी उपप्रमुख रमिता रानाका अनुसार स्थानीय राष्ट्रिय माध्यमिक विद्यालयमा क्वारेन्टिन व्यवस्थापन गरिरहेकै बेला एक्कासि बेहोस भएका ५५ वर्षीय वडाध्यक्ष रानाको निधन भएको हो ।

अहिले उनको शव सेती प्रादेशिक अस्पतालमा राखिएको छ । अब उनको कोरोना परीक्षण गरिने सेती प्रादेशिक अस्पतालले जनाएको छ ।