काठमाडौँ । आसन्न स्वतन्त्र विद्यार्थी युनियन (स्ववियु) निर्वाचन बिथोल्न त्रिभुवन विश्वविद्यालय शिक्षाध्यक्षको कार्यकक्ष र विद्यार्थी कल्याण प्रमुखको कार्यकक्षमा तालाबन्दी गरिएको भन्दै छ विद्यार्थी सङ्गठनले आपत्ति प्रकट गरेका छन् ।

अखिल (छैठौं) सहितका छ विद्यार्थी सङ्गठनले २०८१ फागुन ६ गते मङ्गलबार प्रेसविज्ञप्ति जारी गर्दै उनीहरूले आपत्ति प्रकट गरेका हुन् ।

शिक्षाध्यक्ष प्राडा खड्क केसी र विद्यार्थी कल्याण तथा खेलकुद निर्देशनालयका निर्देशक प्राध्यापक पशुपति अधिकारीको कार्यकक्षमा लगाएको तालाबन्दीप्रति उनीहरूको आपत्ति छ ।

पद्मकन्या क्याम्पस स्ववियु अध्यक्ष ज्योति पनेरु र अस्कल क्याम्पस स्ववियु अध्यक्ष प्रेम जैसीले सोमबारदेखि ताला लगाएका थिए । चैत ५ गतेका लागि तोकिएको स्ववियु निर्वाचनको मिति नजिकिँदै गर्दा तालाबन्दी गरिएको भन्दै त्रिविका छ विद्यार्थी सङ्गठनले आपत्ति जनाए ।

विज्ञप्तिमा त्रिवि अनेरास्ववियु अध्यक्ष सिद्धान्त भट्ट, अखिल (क्रान्तिकारी) त्रिवि अध्यक्ष दिनेश ऐर, त्रिवि अनेरास्ववियुका अध्यक्ष समीर गौतम, अखिल (छैटौँ) त्रिवि इन्चार्ज विवेक जिसी, अखिल (समाजवादी) त्रिवि संयोजक कविन्द्र सी र अखिल (क्रान्तिकारी) त्रिवि अध्यक्ष वीरेन्द्र नेपालीले हस्ताक्षर छ ।

त्रिविमा प्रत्येक दुई वर्षमा स्ववियु निर्वाचन गराउनु त्रिभुवन विश्वविद्यालयको दायित्व र जिम्मेवारी रहेको उनीहरूको भनाइ छ । विद्यार्थीहरूको वैधानिक तथा साझा संस्था स्ववियुको निर्वाचनको विषयलाई लिएर विद्यार्थीबाट नै निर्वाचित भएका र विद्यार्थी कल्याण परिषद् सदस्य रहेका स्ववियुका केही सभापतिले गरेको तालाबन्दीप्रति गम्भीर ध्यानाकर्षण भएको जनाएका हुन् ।

स्ववियु निर्वाचनका गतिविधि बिथोल्ने उद्देश्य राखेर त्रिवि सभामा विद्यार्थीबाट प्रतिनिधित्व गरेका सदस्यले स्ववियु निर्वाचन नगराउने मनसाय राखेर जारी गरेका वक्तव्यसमेतको उनीहरूले आपत्ति जनाएका छन् ।

विद्यार्थीबाट चुनिएका प्रतिनिधि नै यस किसिमको क्रियाकलापमा उत्रनु, विद्यमान स्ववियुको पदावधि थप्ने र समयमै स्ववियु निर्वाचन नगराउने मनसाय राखेर अनेक षडयन्त्रपूर्वक स्ववियु संस्थालाई प्रतिनिधिविहीन बनाउन लागेको उनीहरूको आरोप छ ।

त्रिविले स्ववियु निर्वाचनको मिति सार्वजनिक गरिसकेको र स्ववियु निर्वाचनसम्बन्धी कार्यविधि–२०८९ जारी भइसकेको अवस्थामा विश्वविद्यालयले तोकिएकै समयमै स्ववियु निर्वाचन सम्पन्न गराउनु विश्वविद्यालयको प्रमुख दायित्व हुने विज्ञप्तिमा भनिएको छ । यसका लागि विश्वविद्यालयका पदाधिकारीसहित सबै जिम्मेवार निकायको समेत ध्यानाकर्षण गराएका हुन् ।

स्ववियु निर्वाचन समयमै गराउनु सबै विद्यार्थी सङ्घसङ्गठनको पनि जिम्मेवारी भएकाले यसलाई साझा दायित्व ठानेर स्ववियु निर्वाचन सफलतापूर्वक सम्पन्न गराउन सबै सरोकारवाला पक्षलाई आह्वानसमेत गरेका छन् ।