काठमाडौँ । नेपालले कीर्गिस्तानलाई सङ्घर्षपूर्ण जितस्वरूप १–० गोलले पराजित गर्दा विजय हासिल गरेको छ ।
२०८१ फागुन ५ गते सोमबारबाट दशरथ रङ्गशालामा सुरु भएको फोर नेसन्स इन्टरनेसनल वुमन्स फुटबल च्याम्पियनसिपअन्तर्गत नेपालले जित हासिल गरेको हो ।
किर्गिस्तानसँग सुरुआतमा निकै आक्रामक खेलेको नेपालले गोल थप्न नसक्दा १० मिनेटको गोल नै निर्णायक बन्न पुग्यो ।
खेलको १० मिनेटमा सविता रानामगरको पासमा नेपालकी बिमला चौधरीले हेडरमार्फत गोल गर्दै टोलीलाई पहिलो अग्रता दिलाएकी थिइन् । पहिलो गोल गर्दा नेपालले किर्गिस्तान विरुद्ध थप गोल गर्ने अनुमान धेरैले लगाएका थिए तर नेपालले खेल अवधिभर राम्रा अवसर पाएपनि गोल भने थप्न सकेन । त्यसकारण छ वर्षअघि ८–२ ले आफ्नो पक्षमा पारेको नेपालले अहिले १–० को सङ्घर्षपूर्ण जित निकाल्नुपऱ्यो ।
पहिलो हाफको इन्जुरी समयमा रश्मिकुमारी घिसिङले हानेको बल गोलपोस्टको बारमा लागेर फर्कियो । रिबाउन्ड बललाई पुनः सविता रानाले प्रहार गरिन् । त्यो बलमा पनि पुनः बारमा लाग्न पुग्यो । बारबाट फर्किएको बललाई रेखा पौडेलले प्रहार गरिन् तर त्यसपटक भने किर्गिस्तानका डिफेन्डरले विफल बनाइदिए । खेलको एकासिऔँ मिनेटमा सविताको प्रहार किर्गिस्तानको गोलरक्षक बिट भए पनि गोलपोस्टभन्दा थोरै बाहिरबाट बाहिरिएको थियो ।
खेलको अधिकांश समय नेपाल खेलमा आक्रामक बन्यो । नेपालले धेरै पटक डिबक्सभित्र बल पुऱ्याए पनि किर्गिस्तानका डिफेन्डरले त्यसलाई विफल बनाइदिए । खेलअघि नेपालका मुख्य प्रशिक्षक राजेन्द्र तामाङले टोलीको बलियो पक्ष फरवार्ड लाइन भएको बताएका थिए ।
कीर्गिस्तानसँग त्यही फरवार्ड लाइन चल्न सकेन । फुटबलकै स्टार सावित्रा भण्डारी र रेखा पौडेलले किर्गिस्तान विरुद्ध चमत्कार गर्न सकेनन् । रेखा सुरुआती टोलीमै थिइन् भने सावित्रा दोस्रो हाफमा मैदान प्रवेश गरेकी थिइन् । युरोपबाट बिहान मात्रै आएकी उनीले पहिलो खेलमै मैदान छिरेकी थिइन् । रेखा भने आइतबार नेपाल आएकी हुन् ।
खेलका क्रममा बल अधिकांश समय नेपालको नियन्त्रण रहेको थियो । किर्गिस्तानका खेलाडीले मिडलाइन खासै पार गर्न सकेनन् । उनीहरू रक्षात्मक फर्ममा अधिकांश समय बिताए । नेपालले धेरैपटक गोलका लागि अवसर पायो तर फिनिसिङमा चुक्दा नेपालले एक गोलमा चित्त बुझाउनुपऱ्यो ।
नेपालले दोस्रो खेल फागुन ८ गते लेबनान र फागुन ११ गते म्यानमारसँग खेल्नेछ । चार देश सम्मेलित च्याम्पियनसिपमा शीर्ष दुईमा रहने टोलीले फाइनल खेल्नेछन् ।
