काठमाडौँ । आहा रारा पोखरा गोल्डकप फुटबल प्रतियोगिताको चौबिसौँ संस्करणका उपाधि उज्वेकिस्तानको ब्ल्याकबुल्स एफसीले जितेको छ ।
पोखरा रङ्गशालामा २०८१ फागुन ३ गते शनिबार भएको फाइनलमा छपटकको च्याम्पियन नेपाल पुलिस क्लबलाई ३–१ ले पराजित गर्दै ब्ल्याकबुल्स एफसीले पहिलो सहभागितामा नै च्याम्पियन बनेको हो ।
आहा रारामा दोस्रोपटक विदेशी टोली च्याम्पियन बनेको छ । यसअघि अफ्रिकन युनाइटेड क्लब २०६२ सालमा च्याम्पियन बनेको थियो ।
उपाधिसँगै ब्ल्याकबुल्सले १२ लाख एक हजार रुपैयाँ प्राप्त गरेको छ । उपविजेता बनेको पुलिस क्लबले ६ लाख एक हजार रुपैयाँमा चित्त बुझायो ।
आहा रारामा ब्ल्याक बुल्स नयाँ च्याम्पियनको रूपमा उदाउँदा नेपाल पुलिस क्लब भने एघारौँ फाइनलमा उपविजेतामा सीमित बनेको हो ।
आहा राराको इतिहासमा मनाङ र पुलिस क्लबले सर्वाधिक छपटक उपाधि जितेका छन् । थ्री स्टारको नाममा पाँचओटा उपाधि रहेको छ । सङ्कटा क्लब दुईपटक च्याम्पियन बन्दा आयोजक सहारा क्लब, अफ्रिकन युनाइटेड, एपिएफ र त्रिभुवन आर्मी क्लबले समान एकपटक उपाधि उचालेका छन् ।
प्रतियोगिताको उपाधिमा ह्याट्रिक पुलिस एक मात्र टोली हो । पहिलो र दोस्रो संस्करणको विजेता पुलिस २०६४ सालपछि लगातार तीन वर्ष च्याम्पियन बनेको थियो ।
पाँच वर्षपछि आहा राराको फाइनलमा पुगेको पुलिस क्लब पाँचौँ पटक उपविजेतामा सिमित बनेको छ । यसअघि सभापति कप, बुढासुब्बा, भरतपुर गोल्डकप गरी तीन प्रतियोगितामा लगातार पहिलो खेलमा नै पराजित हुँदै बाहिरिएको पुलिस क्लब आहा राराको भने फाइनलसम्म पुगेको थियो । उज्वेकिस्तानको टोलीसँग पराजित भएपछि पुलिस क्लब किर्तिमान बनाउने सुन्दर अवसरबाट टाढिएको हो ।
