काठमाडौं । नेपालमा थप ७२ जनामा कोरोना संक्रमण (कोभिड १९) पुष्टि भएको छ। स्वास्थ्य तथा जनसंख्या मन्त्रालयले सोमबार बिहान ७२ जनामा संक्रमण भएको पुष्टि गरेको हो । यो सँगै नेपालमा कोरोना संक्रमितको संख्या ६७२ पुगेको छ।

मन्त्रालयका अनुसार राष्ट्रिय जनस्वास्थ्य प्रयोगशाला काठमाडौँ, बिपी कोइराला स्वास्थ्य विज्ञान प्रतिष्ठान धरान, राष्ट्रिय स्वास्थ्य विज्ञान प्रतिष्ठान दाङ, किटजन्य रोग अनुसन्धान तथा तालिम केन्द्र हेटौँडा र भेरी अस्पताल नेपालगञ्ज र प्रदेश अस्पताल सुर्खेतमा गरिएको कोरोना परीक्षणमा थप ७२ जनामा संक्रमण पुष्टि भएको हो ।

भरतपुर अस्पतालमा बिरामीको मृत्यु
यता, भरतपुर अस्पतालको आईसियूमा उपचाररत एक व्यक्तिको मृत्यु भएको छ। लुम्बिनी अञ्चल अस्पतालबाट रेफर गरिएका नवलपरासी रामग्राम–५ का ४८ वर्षिय ती पुरुषको सोमबार बिहान मृत्यु भएको हो ।

राति १२ बजे आईसीयूमा राखिएका बिरामीको बिहान ३ बजेतिर मृत्यु भएको अस्पतालले जनाएको छ । कोरोना हो कि होइन भनेर निश्चित गर्न उनको स्वाब परीक्षणका लागि ल्याबमा पठाएको छ । चिकित्सकका अनुसार दुई दिनदेखि गम्भीर बिरामी परेका ती पुरुषमा छाती दुख्ने, वान्ता हुने तथा श्वाप्रश्वासको समस्या थिए ।

एकै परिवारका १८ जना एकैसाथ भए निको
यता, पर्साको वीरगन्जस्थित नारायणी उपक्षेत्रीय अस्पतालको आइसोलेसनमा रहेका एकै परिवारका एक शिशुसहित १८ जना एकैसाथ निको भएका छन् । अस्पतालका अनुसार कोरोना संक्रमण देखिएपछि अस्पतालमा भर्ना भएका ४ महिने बालकसहित १८ जना निको भएर घर फर्किएका हुन् ।

उनीहरूलाई आइतबार राति डिस्चार्ज गरिएको नारायणी अस्पतालले जनाएको छ । कोरोना निको भएर घर फर्किने सबै १८ जना वीरगञ्जको छपकैया निवासी एकै परिवारका हुन् । डिस्चार्ज हुनेमा ११ पुरुष र ७ महिला छन् । उनीहरुलाई आइतबार राति ११ बजे फूलमालासहित अस्पतालबाट घर पठाइएको हो ।

गत वैशाख २१ गते छपकैयाका एक जना पुरुषमा कोरोना संक्रमण देखिएपछि उनको परिवारका थप १७ जनाको स्वाब परीक्षण गर्दा गत वैशाख २४ गते कोरोना संक्रमण पुष्टि भएको थियो ।