बागलुङबजार । बागलुङको बागलुङबजारस्थित गण्डकी प्रादेशिक अस्पतालमा अमर थापाको पदस्थापन कार्यक्रम सम्पन्न भएको छ ।
२०८१ माघ ८ गते मङ्गलबार गण्डकी प्रदेशका स्वास्थ्यमन्त्री कृष्णप्रसाद पाठकको प्रमुख आतिथ्यमा आयोजित औपचारिक कार्यक्रममाझ उहाँको पदस्थापन सम्पन्न भएको हो ।
सो क्रममा उहाँले स्वाथ्यकर्मी र कर्मचारीलाई राम्ररी काम गर्न आग्रह गर्नुभयो ।
‘स्वास्थ्यकर्मी र कर्मचारीहरूले आआफ्ना ड्युटी ब्युटिफुल प्रकारले पूरा गर्नुहोला’ उहाँको भनाइ थियो ।
थापाले ड्युटीको समयमा अस्पतालबाहिर काम गरेको भेटिए तत्कालै एक्सन लिनुपर्ने बाध्यात्मक अवस्था सिर्जना नगरिदिनसमेत अस्पतालका सबैसित उहाँले आग्रह गर्नुभयो ।
पदभार ग्रहण गर्दै अध्यक्ष थापाले सङ्क्षिप्त मन्तव्य राख्नुभयो ।
कार्यक्रममा अस्पताल व्यवस्थापन समितिका पूर्व अध्यक्ष नारायण शर्मा पौडेल, मन्त्रालयका विभागीय प्रमुख रमेश केसी, बागलुङ नगरपालिकाका मेयर बसन्तकुमार श्रेष्ठ र बागलुङका प्रमुख जिल्ला अधिकारी नेत्रप्रसाद सुवेदीले पनि मन्तव्य राख्नुभएको थियो ।
नवराज पौडेलको अध्यक्षता तथा मेडिकल सुपरिटेन्डेन्ट डा. किरण तिवारीको सञ्चालनमा अघि बढेको सो कार्यक्रममा उपस्थित सहभागीलाई डा. अमित ढुङ्गानाले स्वागत गर्नुभएको थियो ।
व्यवस्थापन समितिमा बाग्लुङ नगरपालिकाका मेयर श्रेष्ठ, प्रमुख जिल्ला अधिकारी सुवेदी, कोष तथा लेखा नियन्त्रण कार्यालयका प्रमुख, अस्पताल मेडिकल सुपरिटेन्डेन्ट तिवारी, बाग्लुङ उद्योग वाणिज्य सङ्घका अध्यक्ष नरेश कँडेल र व्यवस्थापन समितिले मनोनयन गर्ने एक जना महिला रहने बताइएको छ ।
पुरानो व्यवस्थापन समितिको कार्यकाल गत पुस १९ गते समाप्त भएकोमा माघ २ गते मन्त्रालयले नयाँ व्यवस्थापन समितिको प्रमुखको रूपमा थापालाई नियुक्त गरेको थियो । सोहीअनुसार आज पदस्थापन कार्यक्रम भएको हो ।
अस्पताल व्यवस्थापन समिति गठन आदेश–२०८० को दफा ३ बमोजिम जिल्ला समन्वय समितिका प्रमुख थापा अस्पतालको अध्यक्ष बन्नुभएको हो । सो आदेशमा जिल्ला समन्वय समितिको प्रमुख सम्बन्धित जिल्ला अस्पतालको प्रमुख बन्ने प्रवधान छ ।
गण्डकी प्रादेशिक अस्पतालको यसअघिको नाम धौलागिरी अञ्चल अस्पताल रहेको थियो ।
