परासी । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले गणतन्त्र जोगाउनुपर्ने तर सङ्घीयता खारेज गर्नुपर्ने धारणा व्यक्त गर्नुभएको छ ।
२०८१ पुस २७ गते शनिबार सुनवलमा राजमो नवलपरासी (बर्दघाट सुस्ता पश्चिम) द्वारा आयोजित प्रशिक्षण कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
गमलामा पानी हालेर प्रशिक्षण कार्यक्रमको उद्घाटन गरेपछि प्र्रशिक्षण दिँदै उहाँले गणतन्त्र नेपाली जनताको माग भएको तर सङ्घीयता विदेशीको इसारामा ल्याइएको बताउनुभयो ।
‘तपाईंहरूलाई थाहा छ त, गणतन्त्रका लागि नेपाली जनताले कति लामो समय समयदेखि सङ्घर्ष गरिराखेका थिए’ उहाँले भन्नुभयो– ॅत्यही कुरा सङ्घीयताको विषयमा सत्य होइन । सङ्घीयता त विदेशीको इसारमा नेपालमा जबर्जस्ती घुसाइएको हो ।’
उहाँले सङ्घीयता स्वीकार गरेका दलहरूले यस खालको अभिव्यक्ति बेलाबखत् दिने गरेको स्पष्ट पार्नुभयो ।
‘अब तपाईंहरूले सुनिराख्नुभएको छ नि, सङ्घीयता स्वीकारेका काङ्ग्रेस, एमालेका नेताकार्यकर्ताले भन्ने गरेका छन्, सङ्घीयतालाई यो मनले पटक्कै चित्त पारेको छैन तर के गर्ने ? पार्टीले मानेपछि मान्नुपर्ने’ अध्यक्ष केसीले सङ्घीयतासम्बन्धी प्रतिक्रिया उद्धृत गर्नुभयो ।
उहाँले भन्नुभयो– ‘यस्तो कुरा गरेको किन हो भन्दा सङ्घीयता ती पार्टीका नेताकार्यकर्तामाझ छलफल गरेर ल्याइएको होइन बरु विदेशीले षड्यन्त्रमूलक ढङ्गले नेपालमा लादेका हुन् ।’
अध्यक्ष केसीले जनताको भावनाअनुरूप राष्ट्रिय जनमोर्चाले आगामी चैत २४ देखि ३० गतेसम्म एकहप्ते काठमाडौँकेन्द्रित सङ्घीयता खारेजीको आन्दोलन सञ्चालन गर्न लागिरहेको बताउनुभयो ।
उहाँले सो कार्यक्रम सफल पार्न सम्पूर्ण नेताकार्यकर्ताले स्थानीयस्तरबाट तयारी गर्नुपर्ने आवश्यकतामा जोड दिनुभयो ।
सम्बोधनको क्रममा सङ्घीयता र एमसिसीजस्ता क्रियाकलापले देशको राष्ट्रियता खतरामा परेको धारणा पनि उहाँले राख्नुभयो ।
उहाँले राष्ट्रियता, सार्वभौमिकता र भौगोलिक अखण्डताको रक्षाका लागि नेपाली जनता सङ्घर्षमा उत्रिनुपर्ने बताउनुभयो ।
प्रशिक्षण दिने क्रममा उहाँले गणतन्त्र ल्याउन सङ्घर्ष गर्ने राजनीतिक दलहरूले भ्रष्टाचारलाई संरक्षण गरेकै कारण आज गणतन्त्र र राष्ट्रियता सङ्कटमा पारेको बनाउनुभयो ।
उहाँले मुलुक बन्न आम जनता सचेत भएर राजनीतिमा सहभागी हुनुपर्ने धारणासमेत व्यक्त गर्नुभयो ।
कार्यक्रममा राजमो केन्द्रीय सल्लाहकार बद्रे आलम र नेपाल कम्युनिस्ट पार्टी (मसाल) नवलपरासीका प्रवक्ता रेम रानाले पनि शुभकामना मन्तव्य राख्नुभएको थियो ।
कार्यक्रममा राजमो लुम्बिनी प्रदेश समितिका सदस्य तिलकप्रसाद सुवेदीले जिल्लास्तरीय सङ्घर्षका कार्यक्रम प्रस्तुत गर्नुभएको थियो ।
राजमो नवलपरासी अध्यक्ष किसनबहादुर अधिकारीको अध्यक्षता तथा जिल्ला सचिव ढुण्डिराज पोख्रेलको सञ्चालनमा अघि बढेको सा कार्यक्रममा उपस्थित सहभागीलाई जिल्ला उपाध्यक्ष राजेन्द्र अर्यालले स्वागत गर्नुभएको थियो ।
