गोपालप्रसाद भट्टराई, सन्धिखर्क ।
नेकपा (मसाल) का महामन्त्री मोहनविक्रम सिंहले सङ्घीयता नेपालको दिगो विकासको बाधक बनेको दाबी गर्नुभएको छ । ऋण खोज्दै सङ्घीयता धान्दै गर्नुपर्दा समृद्धि र विकास नारामै सीमित भएको उहाँको तर्क छ ।
राष्ट्रिय जनमोर्चाले आसन्न चैतमा गर्ने सङ्घीयता विरुद्ध काठमाडौँकेन्द्रित सातदिने आन्दोलनको तयारीस्वरूप २०८१ पुस १३ गते शनिबार सन्धिखर्कमा सम्पन्न अगुवा कार्यकर्ता प्रशिक्षण कार्यक्रमलाई सम्बोधन गर्दै उहाँले यस्तो बताउनुभएको हो ।
विकेन्द्रीकरणमा आधारित एकात्मक शासन व्यवस्था नै उत्तम रहेको भन्दै महामन्त्री सिंहले सङ्घीयता खारेजीको विकल्प नभएको जिकिर गर्नुभयो ।
सङ्घीयता नहटाए देश अझै खाडलमा फस्ने उहाँको धारणा रहेको छ । जुनसुकै सरकार आए पनि विदेशिने दक्ष युवाविद्यार्थीलाई रोक्न नसक्नुले देश रित्तो हुने भन्दै उहाँले चिन्तासमेत व्यक्त गर्नुभयो ।
सङ्घीयताको खर्चकटौति गरी शिक्षा र स्वास्थ्यको गुणस्तर सुधार गर्ने र रोजगारीको सिर्जना गर्नुपर्ने महामन्त्री सिंहले खाँचो औल्याउनुभयो ।
फरक प्रसङ्गमा उहाँले चीनमाथि हमला गर्न नेपाललाई युद्धभूमि बनाउन भारत र अमेरिकाको सपना पूरा भए मुलुक युद्धको भुमरीमा पर्ने उहाँको भनाइ थियो ।
महामन्त्री सिंहले सोही योजनाअनुसार नेपालमा एमसिसी जबर्जस्ती पारित गराइएको तथा एसपिपी लागु गर्न खोजिएको दाबीसमेत गर्नुभयो ।
कार्यक्रममा राजमो महासचिव मनोज भट्टले अहिलेको सरकार अमेरिका, भारत र चीनलाई खुसी पार्न बनेको आरोप लगाउनुभयो ।
जनताका समस्याको निकास दिन र देशलाई विकास दिन अहिलेको सरकार नबनेको आरोप लगाउँदै महासचिव भट्टले अगाडि भन्नुभयो– ‘भारतले नेपाली भूमिमा डोजर चलाउँदा चुइक्क बोल्न नसक्नु त्यसैको उदाहरण हो ।
राजमो नेता शेरबहादुर बिसीको अध्यक्षता, नेकपा (मसाल) अर्घाखाँचीका प्रवक्ता पशुपति ढकालको स्वागत मन्तव्य र राजमो जिल्ला अध्यक्ष थम्मन केसीको सञ्चालनमा सम्पन्न सो कार्यक्रममा महामन्त्री सिंह र महासचिव भट्टले प्रशिक्षण दिनुभएको थियो ।
जिल्लाका छओटै पालिकाबाट राजमोका अगुवा कार्यकर्ताको सहभागितामा सम्पन्न कार्यक्रममा चारओटा टोली बनाएर समूह छलफलसमेत गराइएको थियो । कार्यक्रममा राजमो नेताहरू टेकबहादुर थापा, पशुपति ढकाल, वीरबहादुर कुँवर र जोगबहादुर सारूले टोलीका सुझाव प्रस्तुत गर्नुभएको थियो ।
कार्यक्रममा राजमो केन्द्रीय सदस्य तथा भूमिकास्थान नगरप्रमुख झबिलाल थापा, राजमो केन्द्रीय सदस्य यमलाल पोख्रेल र अखिल नेपाल महिला सङ्घकी महासचिव शकुन्तला रानालगायतले सहजीकरण गर्नुभएको थियो ।
