काठमाडौँ । प्रगतिशील पत्रकार सङ्घ बागमती प्रदेश समितिले नेपाल पत्रकार महासङ्घ काठमाडौँ उपत्यका प्रदेश समिति र काठमाडौँ जिल्ला समितिका नवनिर्वाचित समितिलाई सम्मान गरेको छ ।
२०८१ पुस ११ गते बिहीबार राजधानीको हार्दिक होटलमा आयोजित एक कार्यक्रममाझ नवनिर्वाचित समितिलाई सम्मान गरिएको हो ।
नेकपा (मसाल) का केन्द्रीय प्रवक्ता रामप्रकाश पुरीको प्रमुख आतिथ्यमा अघि बढेको सो कार्यक्रममा प्रगतिशीलका महासचिव प्रकाश थापामगर, अखिल नेपाल महिला सङ्घकी अध्यक्ष मीना पुन र महासङ्घको उपत्यका निर्वाचन समितिका सदस्य मुकुन्द पौडेलको आतिथ्य रहेको थियो ।
प्रदेश अध्यक्ष रघुनाथ पौडेलको अध्यक्षता तथा सचिव लक्ष्मणदेव पाण्डेको सञ्चालनमा अघि बढेको सो कार्यक्रममा उपत्यका प्रदेश समिति अध्यक्ष टेनिस रोकासहितको टिम र शोभा अर्याल नेतृत्वको काठमाडौँ जिल्ला समितिको टिमलाई प्रवक्ता पुरी, महासचिव थापामगरसहितका अतिथिले सम्मानपत्र र खादा ओढाएर सम्मान गरिएको थियो ।
कार्यक्रममा प्रवक्ता पुरी, महासचिव थापामगर, उपत्यका प्रदेशका अध्यक्ष रोका, काठमाडौँकी अध्यक्ष शोभा अर्यालले सङ्क्षिप्त मन्तव्य राख्नुभएको थियो ।
प्रगतिशीलका उपत्यका प्रदेशको सदस्यमा घनश्याम अघिकारी (वैरागी जेठा), काठमाडौँ जिल्ला समितिमा गोविन्द शर्मा र चेतनारायण बेलबासे निर्वाचित हुनुभएको छ ।
निर्वाचनमा प्रगतिशीलसहित पाँच वामपन्थी पार्टीनिकट पत्रकार सङ्गठन, प्रेस मञ्च र स्वतन्त्र पत्रकार सङ्गठनमाझ सहकार्य भएको थियो । सोही प्यानल उपत्यका प्रदेश र काठमाडौँमा निर्वाचित भएको थियो ।
