काठमाडौं । नेपाल ओलम्पिक कमिटी (एनओसी) मा अध्यक्ष र उपाध्यक्षबाहेक सबै पदमा निर्विरोध भएको छ ।
विवादकाबीच सोमबार राति अनलाइनबाट भएको उम्मेदवारी दर्ताअनुसारा मुख्य दुई पदबाहेक निर्विरोध भएको हो ।
एनओसी अध्यक्ष जीवनराम श्रेष्ठले तेस्रो कार्यकालका लागि आफै निर्वाचित हुन सक्ने गरी विधान संशोधन गर्न लागेको भन्दै असन्तुष्ट पक्ष उच्च अदालत पाटनमा रिट लिएर पुगेको थियो। विधान संशोधनका लागि मंसिर १८ गते विशेष अधिवेशनको तयारी भइरहेका बेला उच्च अदालतले अन्तरिम आदेश दिएर रोक्न भनेको थियो।
तर, उक्त आदेश प्राप्त नहुँदै विशेष अधिवेशन गरी विधान संशोधन भइसकेकाले संशोधित विधानअनुसारै निर्वाचन गराउनुपरेको श्रेष्ठ पक्षको तर्क छ।
तर, अदालतको आदेश उल्लंघन हुने गरी मनोनयन दर्ता प्रक्रिया अघि बढाउन लागेको गुनासो पुगेपछि स्थानीय प्रशासनले बिहानैदेखि ललितपुरको सातदोबाटोस्थित ओलम्पिक कमिटीको कार्यालय नियन्त्रणमा लिएको थियो।
भौतिकरूपमा मनोनयन दर्ताको प्रक्रिया अघि बढाउन नसकेपछि अनलाइनबाट उम्मेदवारी दर्ता गराइएको थियो।
अनलाइनबाट गरिएको उम्मेदवारी दर्ताअनुसार अध्यक्ष र उपाध्यक्षबाहेक सबै पद निर्विरोध भएका हुन्।
अध्यक्षमा तीनजनाको उम्मेदवारी परेको छ। जसमा हालका अध्यक्ष जीवनराम श्रेष्ठ पनि छन्। निलेन्द्रराज श्रेष्ठ र तेजबहादुर गुरुङले पनि अध्यक्षमा दाबी गरेका छन्।
उपाध्यक्षमा ७ सिटका लागि ९ जनाको उम्मेदवारी परेको निर्वाचन समितिले जनाएको छ। ज्योति राणा, गोपालसुन्दर लाल कक्षपति, प्रकाशशमशेर राणा, दावा गुरुङ, अनिलप्रसाद शर्मा, तुल्सी थापा, अशोकरत्न बज्राचार्य र चतुरानन्दराज वैद्यले उपाध्यक्षमा मनोनयन दर्ता गराएका छन्।
महासचिवमा राजीव श्रेष्ठको मात्र उम्मेदवारी परेको छ। यस्तै कोषाध्यक्षमा टासी घले र उपमहासचिवमा रामजीबहादुर श्रेष्ठको एकल उम्मेदवारी परेको छ। तीन सचिवका लागि रमेशप्रसाद शिवाकोटी, भीमसिंह गुरूङ र रामकृष्ण श्रेष्ठले नाम दर्ता गराएका छन्।
पाँचजना सदस्यमा गीता क्षत्री राणा, लाक्पा छिरिङ लामा, राम अवाले, मनीष जोशी र जितेन्द्रबहादुर चन्द छन्।
मतदानको दिन शनिबार तोकिएको छ।
निर्वाचन समितिले यस उम्मेदवारको सूचीमा दाबी–विरोध परेमा आवश्यक छानबिनपछि अन्तिम नामावली सार्वजनिक गर्नेछ।
