जगदीश ढकाल, नेपालगञ्ज ।
बाँकेको कोहलपुरमा प्रगतिवादी साहित्यकार मोहनविक्रम सिंहद्वारा लिखित उपन्यास “कामरेड जलजला” को समीक्षा कार्यक्रम सम्पन्न भएको छ ।
हाम्रो पूर्णिमा साहित्य प्रतिष्ठानको आयोजनामा २०८१ पुस ७ गते आइतबार बागेश्वरी बहुमुखी क्याम्पसमा उक्त कार्यक्रम सम्पन्न भएको हो ।
साहित्यकार सागर गैरेको सहजीकरणमा अर्का साहित्यकार नरेन्द्रजङ्ग पिटरले टिप्पणी गर्नुभएको सो कार्यक्रममा बाँके र बर्दिया जिल्लाका साहित्यकारको उल्लेखनीय उपस्थिति थियो ।
छलफलमा उठेका प्रश्न एवम् जिज्ञासाको जवाफ दिँदै उपन्यासकार सिंहले उपन्यासले पृथ्वीबाट अन्तरिक्षमा पुगेर अर्को विश्वको समेत परिकल्पना गर्दै विचरण गरेको तथा जीवनका कैयौँ वास्तविकतालाई प्रतिनिधित्व गर्ने प्रयत्न गरेको दाबी गर्नुभयो ।
कम्युनिस्ट आन्दोलनको मूल्यमान्यतामा ह्रास भइरहेको अहिलेको परिप्रेक्ष्यमा द्वन्द्ववादको नियमअनुसार सङ्घर्ष गर्दै न्यायपूर्ण समाजको समाजवादी व्यवस्था निर्माणको दिशामा यसले साहित्यको माध्यमबाट भूमिका खेल्ने विश्वास व्यक्त गर्नुभयो ।
उहाँले आगामी दिनमा “कामरेड जलजला” उपन्यासको दार्शनिक पक्षको मात्र उल्लेख गरेर पुस्तक तयार गर्ने योजना रहेको जानकारी दिनुभयो ।
कार्यक्रममा आयोजक प्रतिष्ठानको तर्फबाट अध्यक्ष पुष्कर रिजालले उपन्यासकार सिंहलाई सम्मानपत्र प्रदान गर्नुभएको थियो ।
समारोहमा संविधानसभाका पूर्व उपसभामुख पूर्णाकुमारी सुवेदी, अखिल नेपाल किसान महासङ्घ ९अप्फा० का महासचिव तुलसीराम सापकोटा, अखिल नेपाल युवक सङ्घका अध्यक्ष कृष्णराज पाण्डे, साहित्यकारहरू प्रेम सुवेदी, दीपक शाही, लुम्बिनी प्रदेशका पूर्व सांसद आई।पी। खरेल, प्राध्यापक जनार्दन शर्मा आचार्य, पूर्व प्राज्ञ सनतकुमार रेग्मीलगायतको आतिथ्य रहेको थियो ।
प्रतिष्ठानका अध्यक्ष रिजालको अध्यक्षता तथा सचिव केशव निमेशको सञ्चालनमा सो कार्यक्रम सम्पन्न भएको थियो ।
