(एक सय छयालिसौँ स्टालिन जन्मजयन्तीको सन्दर्भमा)

प्रकाश थापामगर ##

एउटा स्टालिन चाहिएको छ
हिटलरको चिहान पुर्न
मुसोलिनीको चिहान पुर्न
ब्युतिन खोजेका त्यस्तै त्यस्तै
थुप्रै भूतप्रेतका सद्गत गर्न

भनियो, वर्तमान विश्व
एक्काइसौँ शताब्दीमा गरिरहेछ विचरण
भनियो कि युग
बिग ब्याङ र हिग्स बोसान
अनि सूचना, प्रविधि र कलामा
इन्टरनेट र आर्टिफिसियल इन्टेलिजेन्स
तर देखिरहेछौँ हामी
ट्रम्प, पुतिन, मोदी, नेतान्याहु……
अनि, तिनका छरिएका कठपुतली
ब्युझिरहेकै छन् अहिले प्रेतहरू

एउटा स्टालिन चाहिएको छ फेरि
मानवअधिकारको नाममा
थोपर्न खोज्ने नरसंहारका विरुद्ध
एक्काइसौँ शताब्दीको नाममा
थोपर्न खोज्ने फासिवादका विरुद्ध
र संविधानवादको नाममा
थोपर्न खोज्ने अधिनायकवाद विरुद्ध
यस्तै नकावधारीलाई तह लगाउन
अनि जनतन्त्रको रक्षा गर्न

चाहिएको छ एउटा स्टालिन
सर्वहारा जनतन्त्रको रक्षा गर्न
शोषणविहीन समाजको रक्षा गर्न
तेस्रो मुलुकलाई भरोसा दिन
साँच्चै चाहिएको छ अहिले
एउटा स्टालिन फेरि पनि
विश्व फासिवादलाई पराजित गर्न
चाहिएको छ स्टालिन
क्रान्तिकारी विचार र चट्टानी अडान
फासिवाद विरोधी स्टालिन
सर्वहारा वर्गका नेता स्टालिन

(डिसेम्बर २१, २०२४/२०८१ पुस ६ गते)

बुढानीलकण्ठ–१०, काठमाडौँ