चन्डिगढ । मूल प्रवाह अखिल भारत नेपाली एकता समाजले चन्डिगढमा सांस्कृतिक प्रतियोगिता गर्ने भएको छ ।
सुदूर पश्चिमोत्तर क्षेत्रीय समितिअन्तर्गत सांस्कृतिक विभागको आयोजनामा आगामी डिसेम्बर २२, २०२४ का दिन सो प्रतियोगिता हुने भएको हो ।
समाजका क्षेत्रीय अध्यक्ष प्रेम सापकोटाले दिनुभएको जानकारीअनुसार उक्त प्रतियोगितामा अन्तरसङ्गठन, प्रगतिशील एवम् जनवादी आन्दोलनलाई टेवा पुर्याउँदै आएका कलाकारको सहभागिता रहने छ ।
उहाँले प्रतियोगितामा क्षेत्रीय समितिअन्तर्गत नगरका करिब १२ टिमको सहभागिता रहने बताउनुभयो ।
प्रतियोगिता केवल अन्तरसङ्गठन किन राख्नुभयो भन्ने जिज्ञासाको जवाफ दिँदै सापकोटाले भन्नुभयो– ‘प्रगतिशील एवम् जनवादी आन्दोलनलाई टेवा पुराउँदै आएका नयाँ पिढीका कलाकारहरू पनि प्रतिस्पर्धात्मक रूपमा अगाडि बढ्नुपर्ने आवश्यकता हामीले महसुस गर्यौँ । त्यसकारण यो कार्यक्रम आयोजना गरेका हौँ ।’
उहाँले थप्नुभयो– ‘टिमका सहभागी मूल प्रवाह, विद्यार्थी वा बाल सङ्गठनमध्ये एकको सदस्य अनिवार्य हुनुपर्ने, अनुशासनमा रहनुपर्ने, रचनात्मक पक्षलगायत नीति निश्चित गरिएको छ ।’
सापकोटाले गत अक्टोबर ६ मा बसेको क्षेत्रीय समिति सो कार्यक्रम गर्ने निश्चित गरेको बताउँदै यस्तो सिलसिला आगामी मार्च ८ सम्म चल्ने बताउनुभयो ।
