काठमाडौं । सरकारले भारतद्वारा अतिक्रमित भूमि लिम्पियाधुरा लगायतका क्षेत्र समेटेर नयाँ नक्सा सार्वजनिक गर्ने तयारी गरेको छ । नापी विभागले तयार पारेको नयाँ नक्सा मन्त्रिपरिषदले अनुमोदन गरेपछि सार्वजनिक गरिनेछ ।
सरकारको नीति तथा कार्यक्रममासमेत नयाँ नक्सा सार्वजनिक गरिने प्रतिवद्धता उल्लेख गरिएको छ । सोही प्रतिवद्धताका आधारमा भूमि व्यवस्था तथा सहकारी मन्त्री पद्मा अर्यालले नापी विभागलाई नक्सा तयार पार्न निर्देशन दिएको मन्त्रालय स्रोतले जनाएको छ ।
नापी विभागले तयार पारेको नक्सालाई मन्त्री अर्यालले मन्त्रिपरिषद बैठकमा लगेर छलफल गरेपछिमात्र त्यो पारित हुनेछ । नक्सा सार्वजनिक गर्नुअघि सरकारले त्यसका प्राविधिक,कुटनीतिक र अन्य सबै पक्षलाई विचार गरेर परिपक्व निर्णय गर्नुपर्ने मन्त्रालयका एक अधिकारीले बताउनुभयो ।
नेपालको हाल प्रचलनमा रहेको नक्सामा लिम्पियाधुरा छैन । नेपालको संविधानको अनुसूचीमा उल्लेखित राष्ट्रिय नक्सामा समेत लिम्पियाधुरा छैन । सरकारले लिम्पियाधुरा सहितको नक्सा जारी गरेर भारतले अतिक्रमण गरेको भूमि फिर्ता ल्याउन कुटनीतिक पहल गर्ने भएको छ ।
