काठमाडौं । सुदूरपश्चिम रोयल्सले नेपाल प्रिमियर लिग (एनपीएल) मा तेस्रो हासिल गरेको छ। सुदूरपश्चिमले लगातार तेस्रो जित दर्ता गर्दा लुम्बिनी लायन्सले भने लगातार तेस्रो हार बेहोरेको छ।
शनिबारको पहिलो खेलमा सुदूरपश्चिमले लुम्बिनीलाई ४५ रनले पराजित गर्दै एनपीएलमा लगातार तेस्रो जित हात पारेको हो।
सुदूरपश्चिमले दिएको १ सय ८८ रनको लक्ष्य पछ्याएको लुम्बिनीले निर्धारित २० ओभरमा ९ विकेटको क्षतिमा १ सय ४२ रन मात्र बनाउन सक्यो।
लुम्बिनीका विवेक यादवले ७७ रनको अविजित पारी खेलेपनि टोलीको हार टार्न सकेनन्। उनले ५४ बलमा ३ चौका र ७ छक्का प्रहार गरे।
त्यसअघि कीर्तिपुरस्थित त्रिवि क्रिकेट मैदानमा लुम्बिनीले टस जितेर फिल्डिङ रोजेपछि ब्याटिङ गरेको सुदूरपश्चिमले निर्धारित २० ओभरमा ४ विकेटको क्षतिमा १ सय ८७ रनको योगफल तयार पारेको थियो।
सुदूरपश्चिमका लागि ओपन सैफ जैबले सर्वाधिक ९० रनको योगदान दिए।
एनपीएलमा सबै टोलीले तेस्रो खेल खेलिसक्दा जनकपुर र सुदूरपश्चिम मात्र अपराजित छन्। बाँकी पाँच टोलीले एक जित हात पार्दा लुम्बिनी भने तेस्रो खेलसम्म आइपुग्दा जितविहीन हुने एक्लो टोली बनेको छ।
आजै हुने दोस्रो खेलमा कर्णाली याक्स र विराटनगर किंग्स भिड्दै छन्। खेल दिउँसो १ बजे सुरु हुनेछ।
