काठमाडौं । नेपालमा कोरोना भाइरसको संक्रमणबाट पहिलो मृत्यु भएको छ । स्वास्थ्य तथा जनसंख्या मन्त्रालयका अनुसार सिन्धुपाल्चोककी २९ वर्षीया सुत्केरी महिलाको शनिबार मृत्यु भएको हो ।

स्वास्थ्य मन्त्रालयले शनिबार राति विज्ञप्ति जारी गर्दै नेपालमा कोरोनाका कारण पहिलोपटक मृत्यु भएको पुष्टि गरेको छ ।

सिन्धुपाल्चोकको बाह्रबीसे नगरपालिकाको राम्चे घर भएकी २९ वर्षीया सुत्केरी महिलाको कोरोनाका कारण मृत्यु भएको मन्त्रालयले पुष्टि गरेको हो ।

१० दिनअघि ती महिला काठमाडौ‌ँ महाराजगन्जस्थित त्रिवि शिक्षण अस्पतालमा सामान्य किसिमले शिशु जन्माएकी थिइन् । आमाछोरा दुवैको स्वास्थ्य सामान्य रहेका कारण उनीहरू वैशाख २५ गते डिस्चार्ज भएर घर फर्किएका थिए ।

तर घर पुगेपछि ती महिलालाई ज्वरो आउने, खोकी लाग्ने तथा श्वासप्रश्वासमा समस्या हुन थाल्यो । स्थानीय बाह्रबिसे प्राथमिक स्वास्थ्य केन्द्रमा उपचार गर्दा पनि निको नभएपछि धुलिखेल अस्पताल ल्याउने क्रममा बाटैमा उनको मृत्यु भएको हो ।

कोरोनासँग मिल्दो लक्षण देखिएपछि धुलिखेल अस्पतालकै प्रयोगशालमा उनको स्वाबको पीसीआर परीक्षण गर्दा रिपोर्ट पोजेटिभ आयो । अझ निश्चित गर्न उनको स्वाब राष्ट्रिय जनस्वास्थ्य प्रयोगशाला ल्याई परीक्षण गर्दा पनि रिपोर्ट पोजेटिभ नै देखिएको हो ।

त्यसपछि स्वास्थ्य मन्त्रालयले घटना अध्ययनका लागि शनिबार नै टोली धुलिखेल अस्पताल पठाएको थियो । त्यस पश्चात् मन्त्रालयले उनको मृत्यु कोरोनाकै कारण भएको घोषणा गरेको हो ।

मन्त्रालयका अनुसार शनिबार राति ८ः५० सम्म नेपालमा कोरोना संक्रमितको संख्या २८१ पुगेको छ ।