काठमाडौँ । झापा र मोरङमा आगलागीको घटना बढी भएको देखिएको छ ।
राष्ट्रिय बिपत् जोखिम न्युनीकरण तथा व्यवस्थापन विभागका अनुसार मङ्सिर १५ गते १० बजेदेखि मङ्सिर १६ गते सोही समयसम्म झापा र मोरङका चार/चार स्थानमा आगलागी भएको हो ।
त्यस्तै, सुनसरी र कास्कीका दुई/दुई स्थानमा आगलागी भएको छ भने पाँचथर, सप्तरी, सिराहा, धनुषा, बारा, म्याग्दी र बाँकेका एक/एक स्थानमा आगलागी भएको छ तर यी सबै स्थानमा मानवीय क्षति भने भएको छैन ।
झापाको दमक नगरपालिका–१, अर्जुनधारा नगरपालिका–११, शिवसताक्षी नगरपालिका–११ र झापा गाउँपालिका–७ मा आगलागी भएको छ ।
त्यस्तै, मोरङको सुन्दरहरैचा नगरपालिका–५, बेलबारी नगरपालिका–१, सुनवर्षी नगरपालिका–४ र रङ्गेली नगरपालिका–८ मा पनि आगलागी भएको छ ।
एवम् प्रकारले सुनसरीको बराहक्षेत्र नगरपालिका–२ र इटहरी उपमहानगरपालिका–१ मा तथा कास्कीको पोखरा महानगरपालिका–१४ काजिपोखरा र वडा नम्बर २५ अमिनतारामा आगलागी भएको छ ।
सोही प्रकारले पाँचथरको फिदिम–१२ मा, सप्तरीको अग्निसाइर कृष्णसावरण–४ मा, सिराहाको मिर्चैया–१० मा, धनुषाको क्षिरेश्वरनाथ–१ मा, बाराको निजगढ–४ मा, म्याग्दीको बेनी–८ मा र बाँकेको नरैनापुर–५ मा आगलागी भएको छ ।
उपर्युक्त सबै स्थानमा स्थानीय प्रहरीको सक्रियतामा आगो नियन्त्रणमा आएको छ ।
जनावरको आक्रमण
यता रौतहट गुजरा नगरपालिका–१ राइटोलमा बाघको आक्रमण हुँदा दुई जना घाइते भएका छन् ।
आफ्नै घरमा बसिरहेका ६५ वर्षीय पुरुषलाई बचाउन गएका अर्का ५५ वर्षीय पुरुष जाँदा दुवै जना घाइते भएका हुन् ।
घाइते दुवैलाई वीरगजञ्जस्थित नारायणी अस्पतालमा उपचारार्थ लगिएको छ ।
