काठमाडौं । नेपाली कांग्रेसका महामन्त्री गगन थापाले नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री बन्न हप्तैपिच्छे खबर पठाउने गरेको बताएका छन् ।
कीर्तिपुरमा कांग्रेसको चुनावी सभालाई सम्बोधन गर्दै उनले यस्तो बताएका हुन् ।
उनले आफ्नो दुस्मन कोही नभएको उल्लेख गर्दै अहिलेको सरकार तीन वर्ष चल्ने दाबी पनि गरे ।
उनले भने, ‘माओवादी र एमालेसँग पालैपालो सत्ता चलाइसकेका छौँ। अब यही सरकारलाई तीन वर्ष इमानदारीसाथ लिएर जान चाहन्छौँ। किनकि हामी सरकार तलमाथि गर्न चाहन्नौँ। हामी परिणाम दिन चाहन्छौँ। तर प्रचण्डले हप्तामा एकपटक खबर पठाउँछन्, लौन प्रधानमन्त्री बनिदिनुपर्यो भनेर।’
कांग्रेससँग प्रधानमन्त्री बन्ने तागत नभएर वा बन्न नआएर नबनेको नभई यो समय प्रधानमन्त्री फेर्नका लागि उपयुक्त नभएकाले त्यसतिर नलागेको दाबी पनि उनले गरे।
गगनको यो अभिव्यक्तिपछि प्रचण्डको सचिवालयले अब प्रधानमन्त्री बन्न कसैलाई अफर नगर्ने बताएको छ ।
प्रचण्डका स्वकीय सचिव रमेश मल्लले लेखेका छन्, ‘महामन्त्रीजी ! कीर्तिपुरको निर्वाचनमा नेकाको ओरालो बाटो तपाईंको मनोदशाबाट राम्रैसँग छचल्किएछ । यति कुरा हेक्का राख्नुस्, माओवादी अब कसैलाई प्रधानमन्त्री बनिदिनुस् भनेर हिँड्दैन।’
