पोखरा । पोखरा एयरपोर्टबाट अन्तर्राष्ट्रिय उडान अनिश्चित बनिरहेकै बेला भारतको नयाँदिल्लीबाट एउटा निजी जहाज पोखरामा अवतरण गरेको छ ।

नागरिक उड्डयन प्राधिकरण पोखराकी उपनिर्देशक तथा विमानस्थल संचालन महाशाखा प्रमुख जसोदा सुवेदीका अनुसार बिहीबार साँझ ५ः५० बजे जेल एयरको विमान पोखरा आएको हो ।

‘चालक दलसहित ४ जना यात्रु लिएर जेल एयरको सिंगल इञ्जिनको निजी विमान पोखरा आएको हो,विमान यो रात यहीँ रहन्छ र शुक्रबार बंगलादेशको लागि उड्छ,’उनले भनिन्।

सुवेदीले थपिन्, ‘योसहित पोखरा विमानस्थलबाट ९ वटा अन्तर्राष्ट्रिय उडान भएका छन् । आउँदो २६ डिसेम्बरमा चीनको सिचुवान एयरलाइन्सको चार्टर्ड विमान पनि आउँदैछ । पोखरामा आयोजना हुने ड्रागन बोट फेस्टिभलमा भाग लिन आउने चिनियाँ लिएर विमान आउन लागेको हो ।’