काठमाडौँ । नेकपा (मसाल) ले वक्यौता विद्युत् महसुल नबुझाउने उद्योगको लाइन जोड्ने सरकारको निर्णयलाई भ्रष्टाचारको सङ्ज्ञा दिएको छ ।
प्रवक्ता रामप्रकाश पुरीको हस्ताक्षरमा २०८१ कात्तिक २७ गते मङ्गलबार प्रेसवक्तव्य जारी गर्दै पार्टीले यस्तो धारणा व्यक्त गरेको हो ।
लाल आयोगले पनि विद्युत् महसुस असुलउपर गरी लाइन जोड्न भनेको सन्दर्भ उल्लेख गरिएको सो वक्तव्यको पूर्ण पाठ यस्तो छ :
“लाइन काटिएका उद्योगमा बिजुली जोड्ने सरकारको निर्णयप्रति हाम्रो पार्टीको गम्भीर ध्यान आकर्षित भएको छ ।
विगतमा खपत बिजुलीको महसुल नबुझाएकाले ती उद्योगको लाइन काटिएको स्पष्ट छ । अहिले त्यससम्बन्धी लाल आयोगले दिएको सुझावअनुसार पनि महसुल भुक्तानी गरेर मात्र विद्युत् लाइन काटिएका स्थानमा लाइन जोड्नुपर्ने स्थिति देखिन्छ । अहिले सरकारले महसुल असुल नगरेर तुरुन्त ती स्थानमा विद्युत् लाइन जोड्ने जुन निर्णय गरेको छ, त्यसले विद्युतको महसुल नबुझाउने प्रवृत्तिलाई छुट दिन खोजेको जस्तो देखिन्छ ।
विद्युत महसुल नबुझाउने कार्य भ्रष्टाचार हो र त्यसरी महसुल नबुझाएका उद्योगमा महसुल असुल नगरी लाइन जोड्ने कुरालाई हामीले गलत मान्दछौँ र सरकारको त्यस प्रकारको निर्णयको हाम्रो पार्टीले विरोध गर्दछ ।”
