बागलुङ । बागलुङको जैमिनी नगरपालिका–८ छिस्तीमा पिकअपभ्यान दुर्घटना हुँदा पाँचजनाको ज्यान गएको छ । एकजना गम्भीर घाइते भएका छन् ।
छिस्तीबाट सदरमुकाम बागलुङ बजार आउँदै गरेको ग२च ९२४७ नम्बरको भ्यान सोमबार बिहान जैमिनी–७ जैदी र छिस्तीको सिमाना व्यार्थला नजिकै दुर्घटना भएको जिल्ला प्रहरी कार्याल बागलुङका सूचना अधिकारी प्रहरी निरीक्षक केशव थापाले जानकारी दिए।
दुर्घटनामा ज्यान गुमाउने पाँचै जनाको पहिचान खुलेको छ । मृत्यु हुनेमा जीपका चालक बागलुङ जैमिनी–८ छिस्ती केवइका ४१ वर्षीय महेन्द्र पुन, सोही ठाउँका २० वर्षीया रश्मी श्रीष, ७६ वर्षीया नन्दकली पुन, १७ वर्षीय निरज श्रीष र ७५ वर्षीय कुलप्रसाद श्रीष छन्।
भ्यान सडकदेखि पाँच सय मिटरभन्दा धेरै तल खसेको प्रहरी निरीक्षक थापाले बताए।
दुर्घटनामा गम्भीर घाइते भएका सोही ठाउँका ४५ वर्षीय गङ्गाबहादुर श्रीषलाई शरीरको विभिन्न भागमा चोट लागेको छ ।उनलाई उपचारका लागि धौलागिरि अस्पताल लगिएको छ।
