पाल्पा । नेपाली भूमिमा भारतले सडक निर्माण गरेको विरोधमा पाल्पामा राष्ट्रिय जनमोर्चाले गरेको विरोध प्रदर्शनमा प्रहरीले हस्तक्षेप गरेको छ । प्रदर्शनबाट आठ नेता कार्यकर्तालाई पक्राउ गरिएको राजमो पाल्पाले जनाएको छ ।
गिरफ्तार हुनेहरूमा राजमो केन्द्रीय सदस्य सोमकुमार कार्की, जिल्ला अध्यक्ष विशाल दर्लामी, अखिल नेपाल युवक संघका केन्द्रीय अध्यक्ष अनिलकिशोर घिमिरे, राजमो कोषाध्यक्ष टिकाराम पौडेल, अखिल (छैठौं) का केन्द्रीय सदस्य सुदिप पौडेल, राष्ट्रिय परिषद सदस्य सुमन पौडेल, अखिल नेपाल युवक संघका जिल्ला कोषाध्यक्ष बिश्नु नेपाली, अखिल नेपाल महिला संघका केन्द्रीय सदस्य नरमती सिंजाली रहनुभएको छ ।
भारतीय हस्तक्षेप विरुद्ध बुधबार गरिएको प्रदर्शनका क्रममा प्रहरीले हस्तक्षेप गरी पक्राउ गरेको हो । भारतले लिपुलेकमा सडक निर्माण गरी सञ्चालन गरेको विरोधमा लकडाउनकै बिच पनि राजमोले देशका विभिन्न स्थानमा विरोध प्रदर्शन गरिरहेको छ ।
मंगलबार मात्रै काठमाडौंमा भएका छुट्टाछुट्टै प्रदर्शनबाट ३६ नेता कार्यकर्तालाई प्रहरीले गिरफ्तार गरेको थियो ।
यो पनि पढ्नुहोस्ः
राजमो केन्द्रीय कार्यालयबाटै नेताहरु गिरफ्तार (फोटो फिचर)
