गोपालप्रसाद भट्टराई, सन्धिखर्क ।
अर्घाखाँचीको भूमिकास्थानमा भएको प्रथम मेयर कप पुरुष भलिबलको उपाधि वडा नम्बर ५ असुरकोटले जितेको छ ।
२०८१ कात्तिक १४ गते बुधबार भएको फाइनल भिडन्तमा वडा नम्बर २ ढाकाबाङलाई २–० को सोझो सेटमा पराजित गर्दै असुरकोटले उपाधि चुमेको हो ।
च्याम्पियन ट्रफीसँगै असुरकोटले ५० हजार रुपैयाँ नगद पुरस्कार प्राप्त गरेको छ । दोस्रो हुने ढाकाबाङले ४० हजार नगद र ट्रफी पाएको छ । असुरकोटले २५–२१ र २५–२० को सेटमा जित निकालेको हो ।
त्यस्तै, भूमिकास्थानको वडा नम्बर १० धनचौरले तेस्रो स्थान हात पार्यो । भूमिकास्थान–१ ढाकाबाङलाई २–० कै सोझो सेटमा पराजित गर्दै धनचौरले ३० हजार नगद र ट्रफी उचाल्यो ।
भूमिकास्थान नगरपालिकाको आयोजनामा सञ्चालन गरिएको प्रतियोगितामा उक्त नगरपालिकाका १० ओटै वडाबाट गरि १० टिम सहभागी थिए ।
नगरप्रमुख झविलाल थापा, नगर उपप्रमुख बालकृष्ण बन्जाडे, पूर्व नगरप्रमुख रेशम थापा र निमित्त प्रमुख प्रशासकीय अधिकृत तुवलाल सापकोटालगायतले प्रतियोगिताका विजेतालाई पुरस्कार एवम् रेफ्री तथा अन्य सहयोगीलाई कार्यक्रम सफल पार्न उत्कृष्ट भूमिका खेलेको भन्दै प्रशंसापत्र प्रदान गर्नुभएको थियो ।
भूमिकास्थानका कम्प्युटर अधिकृत शेषकान्त घिमिरे ओसनको सञ्चालनमा सम्पन्न प्रतियोगिता समापन समारोहमा नगरपालिकाका जनप्रतिनिधि, कर्मचारी तथा अन्य खेलप्रेमीको उल्लेख्य सहभागिता रहेको थियो ।
