शङ्करप्रसाद पोख्रेल, बुटवल ।
राष्ट्रिय जनमोर्चा रुपन्देहीले तिहार, छठपर्व र नेपाल संवत् ११४५ को अवसरमा शुभकामना आदानप्रदान कार्यक्रम सम्पन्न गरेको छ ।
अध्यक्ष तथा प्रतिनिधिसभाका सांसद चित्रबहादुर केसीको प्रमुख आतिथ्यमा २०८१ कात्तिक १४ गते बुधबार उक्त कार्यक्रम सम्पन्न भएको हो ।
कार्यक्रममा सम्बोधन गर्दै अध्यक्ष केसीले आगामी चैत २४ गतेदेखि हुन गइरहेको सङ्घीयता विरोधी काठमाडौँकेन्द्रित आन्दोलनमा सहभागी हुन आग्रह गर्नुभयो ।
देशमा गणतन्त्र र धर्मनिरपेक्षताको विरुद्धमा भित्री र बाह्य शक्ति लागिपरेको बताउँदै उहाँले सबै दलहरू एकजुट भएर यसको रक्षा गर्नुपर्ने आवश्यकतामा जोड दिनुभयो ।
अध्यक्ष केसीले देशमा भ्रष्टाचार बढेकाले जनतमा गणतन्त्रप्रति निराशा देखिएको स्मरण गराउनुभयो ।
सत्तामा बस्नेहरू सच्चिनुपर्ने आवश्यकतामा जोड दिँदै उहाँले सङ्घीयता नेपालको हितमा नभएकोले आफूहरूले त्यसका विरुद्ध निर्णायक आन्दोलन गर्न खोजेको दाबी गर्नुभयो ।
कार्यक्रमको विशिष्ट अतिथिको आसनबाट बोल्दै बुटवल उपमहानगरपालिकाका प्रमुख खेलराज पाण्डले आफू जनप्रतिनिधि भए पनि सबै राजनीतिक पार्टी तथा सङ्घसंस्थासँग सुझाव लिएर अगाडि बढ्ने गरेको बताउनुभयो ।
उहाँले भन्नुभयो– ‘सबैले राजनीतिक इमानर राष्ट्रिय जनमोर्चाका अध्यक्ष चित्रबहादुर केसीबाट सिक्नुपर्दछ ।
मेयर पाण्डेले आफ्ना कमीकमजोरी भए सुझाव दिनसमेत आग्रह गर्नुभयो ।
कार्यक्रममा राजमो केन्द्रीय सल्लाहकार बद्रे आलम, नेकपा (मसाल) रुपन्देहीका प्रवक्ता लालचन्द पन्थ, नेकपा (एकीकृत समाजवादी) रुपन्देहीका कार्यवाहक अध्यक्ष श्रीराम यादव, नेकपाका केन्द्रीय सदस्य सरद ओली, नेकपा (माओवादी केन्द्र) रुपन्देहीका संयोजक निर्मल जिसी, नेकपा (एमाले) रुपन्देहीका उपसचिव बाबुराम पन्थी, नेपाली काङ्ग्रेसका क्षेत्रीय सभापति प्रजापाल गिरी, क्रान्तिकारी कम्युनिस्ट पार्टीका पिबिएम प्रेम सुवेदी, उद्योग सङ्घ रुपन्देहीका पूर्व अध्यक्ष गणेश अधिकारी, रुपन्देही व्यापार सङ्घका प्रकाश ढकाल, उद्योग बाणिज्य सङ्घ बुटवलका अध्यक्ष हरि अर्याल, बुटवल उपमनपा–८ का वडाअध्यक्ष यज्ञ पङ्गेनी, वडा नं. ६ का अध्यक्ष लोकनाथ न्यौपानेलगायतले शुभकामना मन्तव्य राख्नुभएको थियो।
राजमो लुम्बिनीको कार्यालय भवन चादबारीमा सम्पन्न सो कार्यक्रमको अध्यक्षता जिल्ला अध्यक्ष टानबहादुर केसीले, सञ्चालन सदस्य गङ्गा सापकोटाले र स्वागत सचिव कृष्णप्रसाद पोख्रेलले गर्नुभएको थियो ।
