टेकराज भुसाल, नुवाकोट (अर्घाखाँची) ।
अर्घाखाँचीको भूमिकास्थान नगरपालिकामा नगरस्तरीय प्रथम मेयर कप भलिबल प्रतियोगिता सुरु भएको छ ।
“स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ २०८१ कात्तिक १३ गते मङ्गलबारदेखि सुरु भएको सो प्रतियोगिताको उद्घाटन नगरप्रमुख झबिलाल थापाले गर्नुभएको हो ।
सो अवसरमा बोल्दै मन्तव्य राख्दै थापाले यस वर्षबाट सुरु गरिएको मेयर कपलाई निरन्तरता दिइने प्रतिबद्धता व्यक्त गर्नुभयो ।
नगरप्रमुख थापाले नगरपालिकाले भलिबल प्रतियोगिताको आयोजना गरेर ग्रामीण क्षेत्रमा खेलकुदका गतिविधि बढ्ने विश्वास व्यक्त गर्नुभयो ।
उहाँले भन्नुभयो– स्थानीय तहका जनप्रतिनिधिले खेलकुद क्षेत्रमा चासो राखेकाले प्रतियोगिता आयोजना गरिएको छ । यसले नगरपालिका क्षेत्रभित्र रहेका खेलाडीको प्रतिभा विकास भएसँगै सबै नागरिकलाई फाइदा हुन्छ ।
कार्यक्रममा भूमिकास्थान नगरपालिकाका उपप्रमुख बालाकृष्ण बन्जाडे, पूर्व नगरप्रमुख रेशम थापा, जिल्ला समन्वय समिति अर्घाखाँचीका सदस्य झुपलाल खनाल, वडा नं. १ र १० सम्मका वडाध्यक्ष, सदस्य, नगरपालिका नगरस्तरीय युवा सञ्जालका संयोजक टेकराज भुसाल, पत्रकार महासङ्घ अर्घाखाँचीका कोषाध्यक्ष रुद्रमणि भुसाललगायतको आतिथ्य रहेको थियो ।
कात्तिक १४ गतेसम्म सञ्चालन हुने प्रतियोगितामा नगरपालिकाका सबै वडाबाट १० टिमको सहभागिता रहेको छ ।
प्रतियोगितामा प्रथम, द्वितीय र तृतीय हुनेलाई क्रमशः ५० हजार, ४० हजार र ३० हजार नगद पुरस्कारको व्यवस्था गरिएको छ ।
