काठमाडौं । भारतले नेपालको लिपुलेक क्षेत्रको भूमि अतिक्रमण गरि सडक निर्माण गरेकोप्रति नेपाली एकता समाज जापानले विरोध प्रकट गरेको छ ।
अध्यक्ष देवेन्द्र बस्यालले विज्ञप्ति प्रकाशित गरी भारतले नेपालमाथि गरेको‘हस्तक्षेपकारी, साम्राज्यवादी रवैयाको नांगो प्रदर्शन’ गरेको भन्दै नेपाली जनतालाई यो सह्य नहुने चेतावनी दिनुभएको छ । देश बचाउन आवश्यक परे सम्पूर्ण प्रवासी स्वदेश फिर्ता हुन तयार रहन पनि एकता समाजले आह्वान गरेको छ ।
यस्तै, स्पेन नेपाली एकता समाजले पनि अतिक्रमणको विरोध गर्दै अतिक्रमित भुमि फिर्ताको लागि ठोस र प्रभावकारी कदम अगाडि बढाउन सरकारसँग माग गरेको छ ।
अध्यक्ष दुर्गा शर्माद्वारा जारी विज्ञप्तिमा भनिएको छ, ‘भारतले नेपालमाथि लगातार गिद्धे दृष्टि लगाउँदै आइरहेको छ । नेपालका शासक आफ्नो सत्ता जोगाइरहनको लागि सदैब भारतीय शासकका अगाडि आत्मसर्मपण गर्दै आइरहेका छन् । जसको परिणाम नेपालले पटक पटक भारतीय हस्तक्षेप र थिचोमिचो सहँदै आउनुपरेको छ ।’
एकता समाजले ऐतिहासिक दस्तावेज र प्रमाणहरुका आधारमा आफ्नो अतिक्रमित भूमि फिर्ताको लागि अन्तर्राष्ट्रिय अदालतमा जान पनि जोड दिएको छ ।
