काठमाडौँ । अखिल नेपाल फुटबल सङ्घ (एन्फा) ले यही असोज १२ गते प्राकृतिक प्रकोपमा परी मृत्यु भएका छ जना खेलाडीका परिवारलाई जनही आठ लाख रुपियाँ प्रदान गर्ने भएको छ ।
मकवानपुरको इन्द्रसरोवर गाउँपालिका–३ स्थित एन्फा वत्सलादेवीमा सञ्चालन गरिरहेको प्रशिक्षण केन्द्र (एकेडेमी) मा पहिरो जाँदा आदित्य बलम्पाखी, विकल रेग्मी, प्रियान्स आचार्य, दिवस बाँनिया, अनुपम घलान र साइमन योञ्जनको मृत्यु भएको थियो ।
एन्फा अध्यक्ष पङ्कजविक्रम नेम्वाङको अध्यक्षतामा असोज २० गते बसेको आपत्कालीन बैठकले मृतकका परिवारलाई राहतस्वरूप जनही रु आठ लाख दिने निर्णय गरेको छ । बैठकले प्रत्येक स्मृतिशेष खेलाडीको नाममा परिवारले चाहेको स्थान र क्षेत्रमा दुई लाख रुपैयाँको अक्षयकोषसमेत स्थापना गरिदिने निर्णय गरेको छ ।
उक्त घटनाबारे सत्य तथ्य विवरण सङ्कलन गरी एक महिनाभित्र यथार्थ प्रतिवेदन पेस गर्ने गरी एन्फा केन्द्रीय सदस्य विकासनारायण श्रेष्ठको संयोजकत्वमा तीन सदस्यीय छानबिन समिति पनि गठन गरिएको छ । समितिमा एन्फा सहायक महासचिव दामोदर भट्टराई र केन्द्रीय सदस्य टीकाराम लामा रहेका छन् ।
