श्यामलाल पोखरेल,बुटवल ।
नेपाली भूमि अतिक्रमण गरेर भारतले दार्चुलाको कालापानी क्षेत्रमा बाटो खोलेकोप्रति राष्ट्रिय जनमोर्चाले बिरोध गरेको छ । कालापानी क्षेत्र लिपुलेक र लिम्पियाधुरा नेपालको भूमि भारतले अतिक्रमण गरेर सडक विस्तार गरेको भन्दै राजमोले देशभर बिरोध प्रदर्शन गरेको हो ।
कालापानी क्षेत्र लिपुलेक र लिम्पियाधुराको भू–भाग नेपालको नक्सामा राखेर सार्वजनिक गर्नुपर्ने मागराख्दै सोमबार रुपन्देहीको बुटवलमा राजमोले बिरोध सभा गरेको छ। नेपाललाई सबै भन्दा बढी खतरा भारतबाट रहेकाले आफ्नो भूमी संरक्षणका लागि सबै नेपालीबीच एकता आवश्यक रहेको राजमोका नेताहरुले बताउनुभएको छ ।
बुटवलमा आयोजित कोणसभामा बोल्दै राजमोका नेता गणेश गौतमले भारतले कालापानी क्षेत्रमा हस्तक्षेप गरेर बाटो बनाएको विषयलाई अन्तर्राष्ट्रिय मुद्वा बनाउनु पर्ने बताउनु भयो । भारतले आफ्नो साम्राज्यबादी नीति अनुसार नेपालको स्भाविमान र सार्वभौममाथि ठाडो हस्तक्षे गर्दै आएकाले अब अन्तर्राष्ट्रिय अदालतमा जानुको विकल्प नरहेको बताउनुभयो ।
दिन दाहाडै भारतले नेपाली भूमि मिचिरहँदा पनि सरकारले कुटनीतिक पहल गर्न नसक्नु दुख्खको विषय रहेको बताउँदै तत्काल कुटनीतिक पहल गरेर समस्याको समाधान गर्न सरकारसंग माग गर्नुभयो । नेपालको भूमिमा सडक विस्तार गरेर उद्घाट गर्दासमेत नेपाल सरकारले चाल नपाउनु गम्भीर विषय रहेको बताउँदै दुइ तिहाईको नामको कम्युनिष्ट सरकार भारतसंग बोल्न नसकेको नेता गौतमको दावी छ ।
राजमो रुपन्देही सचिव टानबहादुर केसीले नेपालको लागि सबै भन्दा ठूलो खतरा भारत रहेकाले भारतीय पक्षको विश्वास गर्न नसकिने बताउनुभयो । सचिव केसीले भारतले अतिक्रमण गरेको भूमि फिर्ता गर्न र कालापानीबाट भारतीय सेना फिर्ता गराउन सरकारसंग माग गर्नुभयो ।
कालापानी क्षेत्रबाट मानवसरोवर जोड्ने गरी भारतले विस्तार गरेको बाटो भारतका रक्षामन्त्री राजनाथ सिंहले उद्घाटन गरेपछि नेपालमा चौतर्फी बिरोध शुरु भएको छ ।
कोरोनाको महामारीको बेला भारतले नियतबस नेपालको सहमति बिना कालापानी क्षेत्रमा सडक विस्तार र उद्घाटनलाइ नेपालप्रति भारतको गलत नियत रहेको भन्दै भारतको चौतर्फी बिरोध हुन थालेको छ ।
