काठमाडौं । नेपालमा थप ७ जनामा कोरोना संक्रमण पुष्टि भएको छ। स्वास्थ्य तथा जनसंख्या मन्त्रालयले शनिबार विज्ञप्ति प्रकाशित गरी थप ७ जनामा कोरोना संक्रमण रहेको जनाएको हो ।
राष्ट्रिय जनस्वास्थ्य प्रयोगशाला (टेकु) र कोसी अस्पताल (विराटनगर) का प्रयोगशालामा गरिएका परीक्षणमा थप ७ जनामा कोरोना भाइरसको संक्रमण पुष्टि भएको मन्त्रालयले जानकारी दिएको छ ।
मन्त्रालयका सहप्रवक्ता डा. समीरकुमार अधिकारीका अनुसार ती थप ७ संक्रमितमा उदयपुर भुल्केका १८, ४५ र ६५ वर्षका तीन महिला, कपिलवस्तुका १७ वर्षका एक र १८ वर्षका दुई पुरुष र वीरगन्ज छपकैयाका ६२ वर्षका पुरुष छन् । हालसम्म सबैको स्वास्थ्य अवस्था सामान्य रहेको विज्ञप्तिमा उल्लेख छ ।
योसँगै नेपालमा संक्रमितको संख्या १०९ पुगेको छ । तर तीमध्ये २८ जना सञ्चो भइसकेका छन् । यद्यपि फेरि तीन जनामा संक्रमण देखिएकाले उनीहरूलाई अस्पताल भर्ना गरिएको छ।
