काठमाडौं । पारा ओलम्पिकमा काँस्य पदक विजेता खेलाडी पलेशा गोवर्धनले ओलम्पिकको पहिलो मेडल जित्न पाएकोमा खुशी लागेको बताएकी छन्।
नेपाल उद्योग वाणिज्य महासंघल शुक्रबार गरेको सम्मान ग्रहण गर्दै उनले पदक जितेसँगै आफूले एउटा उद्देश्य पूरा गरेको महशुस गरेको बताइन्।
सबैको साथ र सहयोग भए अर्को ओलम्पिकमा पनि पदक जित्ने बताइन्। प्रयास गरे असम्भव केही नभएको उनको भनाई थियो। पहिला नै राज्यले हेरेको भए आफूले गोल्ड मेडल नै जित्ने दाबीसमेत गरिन्।
उनले भनिन्, ‘ओलम्पिकको पहिलो मेडल हो। यसमा म पनि धेरै खुशी छ। मैले मेरो एउटा उद्देश्य पूरा गरेको छु जस्तो लागेको छ। सबैको साथ र सहयोग भए अर्को ओलम्पिकमा पनि पदक ल्याउनेछु भन्ने आशावादी छु। प्रयास गर्दा केही असम्भव छैन। पहिला नै राज्यले हेरेको भए हामीले गोल्ड नै ल्याउने थियौँ होला। एउटा असम्भव कुरालाई सम्भव गरेर देखायौँ। अझ पनि भन्नेछु म प्रयास गर्नेछु।’
कार्यक्रममा नेपाल उद्योग वाणिज्य महासंघका अध्यक्ष चन्द्रप्रसाद ढकालले राष्ट्रको गौरव बढाउने खेलाडीहरुलाई निजी क्षेत्रले प्रोत्साहनस्वरुप सहयोग र सम्मान गर्नुपर्ने बताए ।
उनले पेरिस ओलम्पिककै इतिहासमा नेपाललाई पदक जिताउन सफल पलेशालाई अझ प्रेरणा र प्रोत्साहन दिनुपर्ने बताए।
महासंघले गोवर्धनलाई ३ लाख, प्रशिक्षक कविराज नेगी लामालाई एक लाख पच्चिस हजार र व्यवस्थापक रामचन्द्र श्रेष्ठलाई ७५ हजार रुपैयाँसहित सम्मान गरेको हो।
पलेसालाई सरकारले ६५ लाख रुपैयाँ दिने निर्णय गरेको छ भने विभिन्न संघ संस्थाले सम्मानित गरिरहेका छन् ।
