नयाँदिल्ली । सहिद सरोज शर्मा (शोभाखर धनञ्जय) को अडतिसौँ स्मृतिदिवस (भदौ ११) को सन्दर्भमा मा मूल प्रवाह अखिल भारत नेपाली एकता समाजले उहाँप्रति भावपूर्ण श्रद्धाञ्जली व्यक्त गरेको छ ।
समाजका केन्द्रीय अध्यक्ष ठाकुर खनालको हस्ताक्षरमा २०८१ भदौ ११ गते तदअनुसार अगस्त २७, २०२४ का दिन प्रेसवक्तव्य जारी गर्दै सिङ्गो सङ्गठनको तर्फदेखि खनालले श्रद्धाञ्जली व्यक्त गर्नुभएको हो ।
प्रेसवक्तव्यमा सहिद सरोज शर्मालाई सङ्गठनको जुझारु, अनुशासित, कर्तव्यनिष्ठ र दृढनिश्चयी सदस्य रहेको बताइएको छ ।
श्रमजीवी वर्गको विपक्षमा देखा पर्ने विभिन्न भड्कावका विरुद्ध सङ्घर्ष गर्दै अगाडि बढ्ने प्रण गरिएको प्रेसवक्तव्यमा अगाडि भनिएको छ– “हाम्रो महान् र निरन्तर क्रान्ति अभियानमा क. सरोज शर्माका सपना सर्वदा जीवित रहने छन् र उहाँको योगदानलाई सदा स्मरण गरिने छ ।”
२०४२ सालको बमकाण्डको आरोपमा भूमिगत हुनुपरेपछि सहिद सरोज शर्मा दिल्ली पुगेर “नेपाली एकता” पत्रिकाको सहसम्पादक बनेर काम गर्नुभएको थियो । सोही क्रममा २०४३ साल भदौ ११ गते नयाँ दिल्लीको बेलारोडमा पत्रिका विक्रीवितरण गर्न जाँदा उहाँले सहादत प्राप्त गर्नुभएको थियो ।
यस्तो छ, प्रेसवक्तव्यको पूर्ण पाठ :
“क. सरोज शर्मा (शोभाखर धनञ्जय) हाम्रो सङ्गठनको जुझारु, अनुशासित, कर्तव्यनिष्ठ र दृढनिश्चयी नेता हुनुहुन्थ्यो । सङ्गठनको जिम्मेवारी पूरा गर्ने क्रममा उहाँको मृत्यु भएको थियो र त्यसरी सङ्गठनले उहाँलाई सहिद मान्दै आएको छ । आज उहाँको स्मृतिदिवस हो । हामीले उहाँप्रति हार्दिक श्रद्धाञ्जली व्यक्त गर्दछौँ ।
हाम्रो सङ्गठनले स्थापनाकालदेखि नै कैयौँ आरोह र अवरोह झेल्दै क्रान्तिकारी अभिभारा पूरा गर्दै आएको छ । श्रमजीवी वर्गको विचारको रक्षाको प्रश्न नै हाम्रो सङ्गठनको वर्तमानको मुख्य अभिभारा हो । हामीले सही कार्यदिशा निश्चित गरी देश तथा प्रवासमा रहने श्रमजीवी नेपालीको बिचमा महत्त्वपूर्ण भूमिका खेल्दै क्रान्तिको विचारको रक्षा गर्न सक्ने छौँ । हामीले दृढतापूर्वक भन्दछौँ कि सबै खालका भड्कावबाट सङ्गठनको रक्षा गर्न हाम्रा अगाडि आउने सबै चुनौतीको सामना गर्न हामी तयार छौँ र रहिरहने छौँ । हाम्रो महान् र निरन्तर क्रान्ति अभियानमा क. सरोज शर्माका सपना सर्वदा जीवित रहने छन् र उहाँको योगदानलाई सदा स्मरण गरिने छ ।”
