इलामबजार । आदिवासी लिम्बु जातिको लिपि किरात सिरिजङ्गा वर्णमाला सार्वजनिक गरिएको छ ।
याक्थुङ युवा मञ्च नेपालको तेस्रो केन्द्रीय परिषद् बैठक उद्घाटनको अवसरमा मञ्चद्वारा प्रकाशित उक्त वर्णमाला २०८१ भदौ १० गते सोमबार सार्वजनिक गरिएको हो ।
याक्थुङ युवा मञ्चका केन्द्रीय अध्यक्ष राजेन्द्र इधिङ्गो मञ्चका सल्लाहकार मधुराज केरुङ, चुम्लुङ प्रदेश सल्लाहकार याम योङ्हाङ, चुम्लुङ इलाम अध्यक्ष बुद्धमाया सोङ्मी, चुम्लुङ इलाम सल्लाहकार बखतबहादुर आङ्देम्बेलगायतले संयुक्त रूपमा वर्णमाला सार्वजनिक गर्नुभएको हो ।
वर्णमाला सार्वजनिक हुनु लिम्बु समुदायका लागि नयाँ इतिहास निर्माण भएको मञ्चका अध्यक्ष इधिङ्गोले बताउनुभयो ।
‘किरात सिरिजङ्गा लिपिको उन्नयन र विकासका लागि हामीले पहिलोपटक वर्णमाला तयार गरेका छौँ’ अध्यक्ष इधिङ्गोले भन्नुभयो– ‘हामीले भाषा र लिपि संरक्षणमा नयाँ इतिहास रचेका छौँ ।’
