बुटवल । रक्तिम सांस्कृतिक अभियानको केन्द्र्रीय सैद्धान्तिक प्रशिक्षण कार्यक्रम समापन भएको छ ।
रुपन्देहीको बुटवलमा २०८१ भदौ १ गतेदेखि सुरु भएको सो कार्यक्रम भदौ २ गते समापन भएको हो ।
रक्तिमका अध्यक्ष गिरीप्रसाद बुढाको अध्यक्षता रहेको समापन कार्यक्रमको राष्ट्रिय जनमोर्चाका उपाध्यक्ष जनकराज शर्मा, राजमो महासचिव मनोज भट्ट, राजमो लुम्बिनी प्रदेश अध्यक्ष बोमबहादुर खत्री, प्रदेश समितिका सल्लाहकार सुरेश थापा, अखिल नेपाल किसान महासङ्घ (अप्फा) का उपाध्यक्ष चन्द्रबहादुर केसी, राजमो रुपन्देही जिल्ला समितिका सदस्य भीमलाल न्यौपानेलगायतका आतिथ्य रहेको थियो ।
कार्यक्रममा प्रशिक्षार्थीको तर्फबाट पूर्ण भुजेल र पुष्पा थापाले मन्तव्य राख्नुभएको थियो ।
देशका विभिन्न जिल्लाबाट करिब ४० जना प्रशिक्षार्थीको सहभागिता रहेको कार्यक्रमको सञ्चालन रक्तिमका महासचिव हेमराज आश्रमले गर्नुभएको थियो ।
दुई दिनसम्म चलेको यस प्रशिक्षणमा रक्तिम र सांस्कृतिक आन्दोलन, लेनिनवादी सङ्गठनात्मक सिद्धान्त, विश्वदृष्टिकोण, प्रगतिशील गीतसङ्गीत, रक्तिमको इतिहास र विधान, राष्ट्रियता, कला र साहित्य, मार्क्सवादी दर्शन, समसामयिक राजनीति, व्यक्तिवाद जस्ता विषयमा प्रशिक्षण सञ्चालन गरिएको थियो ।
प्रशिक्षण कार्यक्रममा नेकपा (मसाल) का महामन्त्री मोहनविक्रम सिंह, राजमो अध्यक्ष तथा प्रतिनिधिसभाका सांसद चित्रबहादुर केसी, राजमो महासचिव भट्ट, मुख्य प्रशिक्षक दुर्गानाथ खरेल, राजमो लुम्बिनी प्रदेशका सल्लाहकार थापा, रक्तिमका अध्यक्ष गिरीप्रसाद बुढा, महासचिव आश्रमलगायतले प्रशिक्षण दिनुभएको थियो ।
प्रशिक्षण समापनलगत्तै भदौ ३ गते रक्तिम केन्द्रीय समितिको बैठक बसी विभिन्न विषयमा निर्णय गरेको बताइएको छ ।
ॅनिर्णयमा रक्तिमको मुखपत्र “रक्तिम अभियान” को तेस्रो अङ्क प्रकाशन गर्ने, जिल्लाहरूमा प्रशिक्षण तथा साङ्गठनिक कार्यक्रम सञ्चालन गर्ने, प्रगतिशील देउसीभैलोको तयारी गर्नेलगायत रहेका छन्’ अध्यक्ष बुढाले युगदर्शनसित भन्नुभयो ।
