काठमाडौं । इजिप्टको कायरोस्थित नेपाली दूतावासले लेबनानमा रहेका नेपालीलाई सतर्कता अपनाउन आग्रह गरेको छ ।

इरानमा हमासका प्रमुख नेता इस्माइल हनियाको हत्यासँगै मध्यपूर्वमा द्वन्द्व बढ्न सक्ने अनुमानपछि नेपाली दूतावासले यस्तो आग्रह गरेको हो ।

इजरायलको आक्रमणमा इरानमा हमास प्रमुख इस्माइल हनिया तथा लेबनानमा हिजबुल्लाहका कमान्डर फुआद सुकर मारिएपछि मध्यपूर्वमा हिंसा चर्किने खतरा बढेको छ।

लेबनानसमेत हेर्ने इजिप्टको कायरोस्थित नेपाली दूतावासले सूचना जारी गर्दै भनेको छ, ‘लेबनानमा विकसित घटनाक्रमका सन्दर्भमा उक्त मुलुकमा रहेका सम्पूर्ण नेपाली नागरिकहरूलाई आवश्यक सतर्कता तथा सचेतना अपनाउन एवम् सहायताका लागि नेपाली राजदूतावास कायरो तथा बेरुतस्थित अवैतनिक नेपाली वाणिज्यदूतावासका देहायानुसारको नम्बरमा सम्पर्क गर्नुहुन अनुरोध छ।’

लेबनानमा रहेका नेपालीको सूची अद्यावधिक गर्ने प्रयोजनका निम्ति दूतावासको वेबसाइटमा रहेको लिंकमार्फत आवश्यक विवरण उपलब्ध गराइदिन पनि दूतावासले आग्रह गरेको छ।

बुधबार इजरायलले लेबनानको राजधानी बेरुतमा हिजबुल्लाह कमान्डर फाउद शुक्रलाई मारेको दाबी पनि गरेको छ।

यसअघि लेबनानस्थित भारतीय दूतावासले पनि अति आवश्यक अवस्थाबाहेक लेबनान यात्रा नगर्न भारतीयहरूलाई आग्रह गरेको थियो ।

कायरोमा सम्पर्कका लागि
इमेल : eoncairo@mofa.gov.np

सम्पर्क व्यक्ति : दीपक घिमिरे – द्वितीय सचिव, फोन नम्बर +201097772348 (ह्वाट्सएप)

माधवराज काफ्ले – तृतीय सचिव, फोन नम्बर +201002505997 (ह्वाट्सएप)

बेरुतमा सम्पर्कका निम्ति–

इमेल : consul@consulateofnepal.com
मोहम्मद गोजायल, अवैतनिक महावाणिज्यदूत फोन नम्बर +9613301181/+96171688821/+96181883713