काठमाडौँ । प्रगतिशील लेखक सङ्घले “मार्क्सवादी दृष्टिकोणमा धर्मसंस्कृति” विषयमा त्रिहत्तरौँ परिसंवाद सम्पन्न गरेको छ ।
प्राडा बद्रिविशाल पोखरेलले विषयवस्तु प्रस्तुत गर्दै २०८१ साउन ४ गते प्रलेस कार्यालय बागबजारमा सो कार्यक्रम सम्पन्न भएको हो ।
कार्यक्रममा आफ्ना धारणा राख्दै उहाँले धर्मभित्रको रूढिवाद, अन्धविश्वासलाई हटाएर मानव सेवामा क्रियाशील हुनु नै वास्तविक धर्म भएको बताए ।
उनले भने– ‘धर्मलाई नयाँ सन्दर्भअनुसार सिर्जनात्मक तरिकाले प्रयोग गर्दै जानुपर्दछ ।’
अध्यात्मवाद भनेको रूढिवाद हो तर अध्यात्म भनेको मनोवैज्ञानिक कुरा भन्ने धारणा राख्दै उहाँले भन्नुभयो– ‘अध्यात्मवादभित्रका नकारात्मक पक्षको खण्डन गर्दै तथा सकारात्मक पक्षको ग्रहण गदै अगाडि बढ्नुपर्दछ ।’
मार्क्सले पनि क्याथोलिक धर्मभन्दा प्रोटेस्टेट धर्म तुलनात्मक रूपमा सकारात्मक भनेको बताउँदै साहित्यकार पोखरेलले धर्मको तुलनात्मक अध्ययन गर्दै एकदमै उग्र तरिकाले होइन, मात्रात्मक रूपमा परिवर्तनको दिशामा अगाडि बढ्नुपर्ने बताए ।
प्रलेसका अध्यक्ष डा. मधुसूदन गिरीको अध्यक्षतामा भएको परिसंवाद कार्यक्रमको सञ्चालन सङ्घकी उपाध्यक्ष नमुना शर्माले गरेकी थिइन् ।
कार्यक्रमको विषयवस्तुबारे परिसंवाद कार्यक्रमका संयोजक समीर सिंहले प्रस्ट पारेका थिए ।
कार्यक्रममा पूरक टिप्पणी गर्नेहरूमा प्राडा जीवेन्द्रदेव गिरी, मातृका पोखरेल, बिजुला रायमाझी, आरसी न्यौपाने, शेखर अर्याल, शशी कार्की, जीवनारायण खनाल, पूर्ण भण्डारी, नानीमैया अधिकारी, नर्मदेश्वरी सत्याल, गणेशा कार्की तथा समीर रहेका सिंह थिए ।
