दार्चुला । भारतका विभिन्न शहरबाट मजदुरी गरेर घर फर्कने क्रममा लकडाउन भएपछि धार्चुलामा रोकिएका नेपालीलाई आज (बिहीबार) स्वदेश भित्र्याइएको छ ।

दार्चुला पारि धार्चुलामा क्वारेन्टिनमा बसेका हजारभन्दा बढी नेपालीलाई त्यहाँका दुई नाकाबाट प्रवेश अनुमति दिइएको दार्चुलाका सहायक प्रमुख जिल्ला अधिकारी टेकसिंह कुँवरले जानकारी दिनुभयो ।

नेपालीहरुलाई घर फर्काउनका लागि दार्चुलाको दत्तु–बालुवाकोट र दार्चुला–धार्चुला तथा बैतडीको झुलाघाट नाका खुला गरिएको छ । नाका खुला गरिएपछि करिब दुई हजार नेपाली आज नेपाल प्रवेश गरेका छन् ।

झुलाघाट नाकाबाट ८३७ जना भित्रिन लागेका बैतडीका प्रमुख जिल्ला अधिकारी आनन्द पौडेलले बताउनुभयो । यस्तै धार्चुला नाकाबाट एक हजार ६१ जना भित्रिन लागेका दार्चुलाका प्रमुख जिल्ला अधिकारी यदुनाथ पौडेलले जानकारी दिनुभयो ।

कोरोना महामारीका कारण सीमा नाका बन्द गरिँदा २ हजारभन्दा बढी नेपाली एक महिनादेखि भारतीय भूमिका क्वारेन्टिनमा बिजोग गरेर बसिरहेका थिए।

भारतीय क्वारेन्टिनबाट फर्किएकाहरूलाई स्वास्थ्य जाँचपछि सम्बन्धित स्थानीय तह पठाइनेछ । सम्बन्धित स्थानीय तहले नै आफ्ना नागरिक लान गाडीको व्यवस्था गरेका छन् । गाउँ फर्काएपछि पनि उनीहरूलाई १४ दिन क्वारेन्टिनमा राख्ने व्यवस्था मिलाइएको स्थानीय जनप्रतिनिधिले बताएका छन् ।

भारतको पिथौरागढ जिल्लाका १५ स्थानमा रहेका क्वारेन्टिनमा १५ सयभन्दा बढी नेपाली छन्।

यता, कञ्चनपुर र कैलालीका भारतीय सीमामा अलपत्र नेपालीले भने अझै स्वदेश अनुमतिको प्रवेश पाएका छैनन् ।

कञ्चनपुरका बनबासा, टनकपुरमा २ सय ५१ र कैलालीमा १ सय ३५ नेपाली १ महिनादेखि क्वारेन्टिनमा छन् । तर उनीहरूको अझै उद्धार नसकेको हो । ती नेपालीको उद्धारका लागि स्थानीय प्रशासन गृह मन्त्रालयको आदेशको पर्खाइमा छ ।

महाकाली पारि अलपत्र नेपालीः जनप्रतिनिधि ल्याउन खोज्छन्, सरकार रोक्छ